Shillong, Risaw 02
Ka seng Hynñiewtrep Youths’ Council (HYC) ka la lap ba ka jingpyntrei ïa ka Meghalaya Integra -ted Transport Project (MITP) ba la bei tyngka da ka World Bank naduh Mawmaram, Nongthliew, Mawmih Diengiei, Maw -lyndep shaduh lad Umsaw ka la long ka jingpyntrei kaba la shu leh torti da ka kompeni kaba la shimti ïa ka kam.
Ïa kane la lap da ka HYC Diengiei Circle ha ryngkat ki nongkitkam ka HYC Krang unit kiba la hiar ban jurip ïa ka jingpyntrei ïa kane ka surok naduh Mawmaram, Nongthliew, Mawmih Diengiei, Mawlyndep shaduh lad Umsaw bad lap ïa ka jingtrei torti jong ka kompeni kaba pyntrei ïa ka kam.
Na ka liang jong ki nongïalam bad dkhot ka seng hadien ba ki la lap ïa ka jingtrei kaba long torti, la ïohi ba ha kawei na ki bynta jong ka surok, ki la lah ruh wat ban pied tang da ka kti ïa ka rong kaba la dep ban siang bad pyni ba ka rukom siang ka dei kaba la shu leh tang dep.
Lah ban pynkynmaw hangne ba ka jingpyntrei ïa kane ka surok kaba jrong haduh kumba 40 kilometer la sdang naduh u snem 2020-21 ha ka jingmang tyngka kumba T.64 klur.
Na ka liang jong ka HYC lyngba ka kyrwoh ka la pynpaw ba ïa katei ka surok la pyntrei da ka kompeni M/S Tanor Engineering Sunshine Sawkmie (JV), bad la lap ba ka jingpyntrei torti ïa kane ka surok ka long kumba la saphriang ha ki video ha kaba ïadei bad ka jingsiang rong torti ïa ka surok kaba la ktah jur bad buh jingma ïa ki paidbah jong ka thaiñ Diengiei Area khamtam ïa ki kali kiba ïaid bad kiba kit ïa ki mar ki mata.
Nalor kata, ka HYC ka la ong ba kane ka ka jingpyntrei torti bad ka jingpynslem ïa kane ka surok ka la ktah jur ïa ka koit ka khiah jong ki nongshong shnong lyngba u pum-pum bad ka la wanrah ruh ka jingeh kaba khraw ïa ki nongleit nongwan bad kaba buh jingma ruh na ki jingmynsaw ïa ki nongleit nongwan.
Ha kawei pat ka liang, ka HYC ka la kynnoh ruh ba kane ka kompeni kaba pyntrei ïa kane ka surok kam shym la bud satia ïa ki kyndon kumba dei ban leh.
Kumta na ka liang ka HYC ka kyntu ïa u MLA ka Sohïong konstitwensi u Bah Synshar Thabah ba un tuklar mardor ïa kane ka kam khnang ba kan ym wanrah jingeh ïa ki paidbah nongleit nongwan.
