Shillong, Risaw 02
Ka Sorkar Jylla ka la buhthong ban pyndep noh ban jied ïa ka kompani ka ban sa shimti ban pynïaid ïa ka Ambulance 108 ka ban ai jingshakri ïa ki paidbah ka Jylla.
Kumba ka long mynta, ïa ka jingshakri la pynïaid shipor lyngba ka National Health Mission (NHM) hadien ba la kut noh ka por ban ai jingshakri ka GVK EMRI.
Haba ïakren bad ka Myntri ka koit ka khiah, ka Kong Ampareen Lyngdoh, ka la ong ba ïa mynta shipor, ka jingai jingshakri ka bteng lyngba ka NHM hynrei la dep khot ‘tender’ na ka bynta ban ïoh ïa ka kompani ka ban shimti ban ai jingshakri ha kane ka Jylla.
Ka Sorkar Jylla ka la dep kren shai ba ïa ka Ambulance 108 kam lah ban shimti hynrei hap ban aiti sha kano-kano ka kompani kaba don ka jinglah ban ai jingshakri ha kane ka bynta na ka bynta ka jingmyntoi ki paidbah kiba donkam kyrkieh ïa ka jingshakri ha ka liang ka koit ka khiah.
Ka Kong Ampareen ka la ong ba ka ‘tender’ ka dang ïaid mynta ban pdiang ïa ki kompani kiba kwah ban donbynta ha ka jingai jingshakri bad yn sa jied kawei napdeng kito kiba ïashim bynta ha ka ‘tender’.
“Ka ‘tender’ ka dang ïaid mynta bad ngi kyrmen ba ha shiteng jong une u bnai Risaw, yn sa lah ban pyndep noh ïa ki kam baroh,” la ong ka Myntri ka koit ka khiah.
