Shillong, Risaw 02
Ki nongshong shnong jong ka Jhalupara ki la ïoh ban kem noh ïa ki ar ngut ki snar nongtuh na kawei ka ïing sah wai kaba dei trai da u Akhil Ahmed kaba don ha Jhalupara.
Kine ar ngut ki nongtuh kiba la shah kem ki dei kiba la donkti ha ki kam tuh kam thiem ha kylleng ki bynta jong ka nongbah Shillong kum ka jingleit prong tuh ïa ki ïing briew ha kaba ki la ïoh ban tuh ka ksiar bad ka pisa.
Ka jingïoh kem ïa kine ki nongtuh ka la long lyngba ka kor ring dur CCTV, ha kaba la lap ïa kitei ar ngut kiba rah ïa ka pla jong ka trai ïing ba don ki ksiar bad ka pisa. Kumta dei tat hadien ka jingpynap shrip la ïoh ban kem noh ïa ki bad hadien kane la aiti noh sha ki pulit jong ka thanat Oxford Rilbong.
La ïathuh ba kine ar ngut ki nongtuh ki dei kiba ju mlien ban tuh na kylleng ka sor Shillong. Kane ka jingshah kem jong ki ka dei hadien ba ki la tuh na Oxford Laban.
Shuh shuh la ïathuh ba kitei ar ngut ki la thmu ban tuh ïa ki juti na kawei ka ïing ha Oxford, hynrei ha kane ka por ki lap pynban da u shabi ïing bad ki la ïoh ban rung ha kane ka ïing bad rah syndon ïa ka ksiar bad ka pisa kumba T.45,000 eiei bad ym tang katta ki la ïoh ruh ban tuh haduh 3 jaka ha kine ki sngi ba la dep.
Ki briew kiba sah marjan ha katei ka ïing, ki la ïathuh ba man ka por ki ju lap ïa ki briew kiba leh ïa ki kam sniew ha phyllaw jong katei ka ïing sah da kaba injek drok haba shit haba shai bad kiwei kiwei ki jingïadih buaid.
Na ka liang jong kine ki briew lem bad u trai jong katei ka ïing, ki la ïathuh ba watla ki la dep ban ujor la bun bunsien sha ki pulit hynrei ka shu long leh nohei namar ba kam don ka jingshimkhia satia.
Haba ïadei bad kane naka liang ki pulit ki dang pynlong ka jingtohkit bad talasi ïa ki kamra ha katei ka building ba dei trai da u Akhil Ahmed kaba don ha Jhalupara.
