Shillong, Risaw 02
U MLA barim ka Mawlai konstitwensi, Bah Process T Sawkmie uba dei ruh uwei na ki nongïalam ka United Democratic Party (UDP) u la ong ba u long uba kloi ban mih shakhmat ban ïakhun ïa ka ilekshon MP sha ka ïingdorbar Lok Sabha ha u snem ban wan.
“Nga long uba kloi ban mih shakhmat ban ïakhun ïa ka ilekshon MP lada na ka liang jong ka UDP ka ibit ban ai ïa ka tiket sha nga,” la ong u Bah Process haba kren sha ki lad pathai khubor ha ka Lah Sngi U Blei.
Lah ban kdew ba nalor ka kyrteng u Bah Process, ki kyrteng jong kiwei pat ki nongïalam ka UDP ruh ki la mih bad saphriang ha ki lad pathai khubor kiba kynthup ïa u Myntri Sorkar Bah Paul Lyngdoh, CEM barim ka KHADC Bah Titos-starwell Chyne bad u Bah Jemino Mawthoh ban ïakhun ïa ka ilekshon MP ha u snem ban wan Shillong Parliamentary Seat.
Haba pynshai ïa kane ka khubor, u Bah Process u la ong ba haduh mynta na ka liang jong ka UDP kam pat shim satia ïa kano-kano ka rai haba ïadei bad ki kyrtong ban ïakhun ïa ka ilekshon MP na Shillong Parliamentary Seat, hynrei kum uwei na ki nongmihkhmat ba la ih bha ha ka saiñ hima, u long ba la kloi ban ïakhun lada ka UDP ka ibit.
Shuh shuh u Bah Process u la kam ba u la don palat 30 snem ha ka kam saiñ hima ban shakri ïa ki paidbah bad lada u shah jied ban long MP kan nang plie lad shuh shuh ban nang shakri ïa ka Meghalaya baroh kawei.
“Lada ka UDP ka ibit ïa nga, nga long ba la pynkhreh ban ïakhun ïa ka ilekshon MP na Shillong, hynrei ïa kane ka rai yn shim hadien ka jingïalang jong ka seng ban ïakren halor kane ka phang,” la ong une u MLA barim ka Mawlai.
