Shillong, Risaw:
Ka Central Bureau of Communication (CBC), Field Office, Nongstoiñ, ha ka jingïatreilang bad ka ophis CDPO, Nongstoiñ, ICDS Project ka la pynlong ïa ka ‘Outreach Programme’ halor ka ‘Poshan Maah’ bad ‘Swachhata Hi Seva’ ha Trysem Hall, Nongstoiñ ha ka 29 tarik Nailur, 2023.
Ka jingphai khmat ba kyrpang jong kane ka prokram ka long ban ai jinghikai ïa ki briew shaphang ka bynta ba kongsan jong ka bam kaba tei bad ka jingkongsan ban don ïa ki rukom bam ba koit ba khiah.
Ka Kong B. Rynjah, CDPO, Nongstoiñ ICDS Project ka la ai jingkren halor ka koit ka khiah bad ka jinglehkhuid.
Ka la ban jur ba ka jinglehkhuid ka ïaid ryngkat-ryngkat bad ka bam kaba tei ban ïada ïa ka koit ka khiah jong u briew da kaba don ïa ka mariang kaba khuid kaba lah ban pynsangeh ïa ka saphriang ka jingpang.
Ka Kong Syiemlieh, Lady Supervisor, Nongstoiñ ICDS, ka la ai jingkren halor ka Physical Health & Mental Health. Ka la ong ruh ba ka jingkongsan ban bam ïa ki jingbam kiba tei bad ki jingbam kiba dap kyrhai – ‘protein’, ‘carbohydrates’, ‘calcium’ bad kiwei-kiwei na ka bynta ki khynnah kiba dang khie samla, ki longkmie kiba dang pun bad ki khynnah.
Nalor ka prokram jingpynkhuid, la pynlong ruh ïa ka jingbam smai ‘Poshan’ bad ‘Swachhata’. La pynlong ruh ïa ki jingïakop kum ka ‘Art’, ‘Extempore Speech’ & ‘Best Slogan’ na ka bynta ki khynnah pule jong ka Nongstoiñ Public Secondary School bad la sam ruh ïa ki khusnam sha ki nongjop. La ïoh ruh ïa ki kyntien ai khublei na ka Field Publicity Asst., CBC, FO, Nongstoiñ, Kong Delicia E. Jyrwa.
