Shillong, Risaw 02
U dewïong ba la lum thup harud surokbah Shillong-Guwahati ha Mawlai Mawïong Rim la katto-katne bnai u dang don haduh mynta wat hadien ba la kular da ki bor district ban pynthylli noh ïa kane ka jaka.
Une u dewïong u dei uba la lum thup hadien ba la kurup ïa ki trok kit dewïong beaiñ bad la pynlang ha Mawlai Maw -ïong Rim harud surok mar pyrshah bad ka lad ban rung sha ISBT bad Mawlai Bypass.
Dang shen ka Dorbar Shnong Mawlai Mawïong Rim hapoh ka jingïalam u Rangbah Shnong lem bad ki nongkitkam shnong ki la ïakynduh khnang ïa ka Deputy Commissioner ka East Khasi Hills district ka Kong RM Kurbah ban pan jingshai halor ka jinglum ïa u dewïong bad kyrpad ruh ban pynkhuid noh na kane ka jaka.
Ka DC ka la kular ban leh ei ei noh ban weng ïa une u dewïong tang hapoh ki khyndiat sngi bad ki nongkitkam shnong ruh ki la kmen ïa ka jingkular ki bor district lyngba ka DC.
Hynrei une u dewïong haduh mynta u dang don ha kane kajuh ka jaka bad ym pat ïohi dak ban khat lane pynkhuid noh na kane ka jaka ba la pynlang mynta la bun bnai.
