Shillong, Risaw 03
U Waheh Shnong ka Lapangap, Bah Deimonmi Lyngdoh u la pdiang sngewbha ïa ka rai jong ki ar tylli ki jylla kata ka Meghalaya bad Assam ba kin phah da ki CRPF ban pahara ha khappud khamtam ha shnong Lapangap, West Jaiñtia Hills District kaba don ka jingïakajia ha kine ki khyndiat sngi ba la dep.
Haba ïakren bad u Bah Deimonmi u la ïathuh ba ka shnong Lapangap ka pdiang sngewbha lada phah da ki CRPF ban pahara ha khappud namar u la ïohi ba ki pulit Meghalaya kim lah ban ai jingïada ïa ki paidbah haba wan thombor ki paidbah na Karbi bad ki pulit Assam.
“Nga ïohi ha kine ki sngi ki pulit Meghalaya kim lah ban ïada ïa ngi ki paidbah namar kim shym la ïoh hukum tang ban leit sha lyngkha haba ka don ka jingïakynad hapdeng ki paidbah na Meghalaya bad Assam” u la ong.
U la ïathuh ba mynta ka sngi ki nongrep na Lapangap ki la leit bad wan phai suk na jaka rep kaba ki ju leit rep ha Nongjrong kaba hap ha jylla Assam.
Nalor kata, u la ïathuh biang ba kane ka jaka rep ha Nongjrong ka dei ka shnong ba shong ki Pnar tangba shaneng bad sharum la ker da ki shnong Karbi, namar kane ka shnong ka hap ha Labang Nongphyllut Elaka kaba la hap noh sha Assam.
Shuh shuh u la pyntip ba ha ka 29 tarik u bnai ba dang shu dep ka shnong ka la rai ban pyrshah ban leit phut ïa ki tynrai dieng hynrei ki lah ban duh ïa u kba ba ki la rep namar lada mynta ki la shah ban rep ïa u kba ym donkam shuh ban phut ïa ki tynrai dieng.
Kane ka jingpyrshah ka dei namar ka jingïakynduh ki ar tylli ki District Administration ka West Jaiñtia Hills District bad Hamren District ki la rai ban phut noh ïa ki tynrai dieng ba la thung ha ki lum kiba hap ha Lapangap hynrei ki paidbah kim pdiang ïa kane namar mynta ki la lah ban leit rep sha ki lyngkha ba hap ha jylla Assam.
