Shillong, Risaw 03
Ha ka janmiet jong ka Sngi Hat Majai, ka 3 tarik Risaw, la lap ïa ka metïap jong ka Phibankyntiew Sunn, ka samla kaba la jah rngai na la ïing naduh ka 20 tarik Nailur, na ka thaiñ Traw, East Khasi Hills.
Katei ka samla kaba dang 18 snem ka rta, ka la jah rngai na la shnong na Marbisu bad uwei pat u samla – Wanboklang Kurbah (20 snem ka rta) naduh ka 20 tarik u bnai ba la dep bad la ong ba ïa kitei ki ar ngut la ïohi khatduh ha ka por kumba 5 baje janmiet ha katei kajuh hi ka sngi.
Haba pyntikna ïa kane, u Kñi jong katei ka samla u la ïathuh ba ïa ka met jong ka la lap shajan ka wah Kshih kaba don sha ka thaiñ Traw bad la ïohi nyngkong eh da ki nongkhwai.
“Ngi lap na shane sha um Kshih jong ka Wah Traw, ka um kaba wan lyngba jong ka jingkieng Lwai. Kane ka um ka poi sha Traw. Ka jaka ka long kyndong bad ym ju don ba leit hi shato,” u la ong.
U ïathuh ruh ba la lap ïa ka met naduh ka Lah Sngi U Blei ha ka por kumba 3 baje nohphai sngi, hynrei ha kaba nyngkong la suba ba ka dei ka met jong u shynrang briew namar la lap ha ka rukom ba shu dem pyllup bad kumta ym lah ban ithuh ïa ka dur ka dar.
Hynrei ynda ki pulit ki la dep ban tan ïa ka met hynne ka step, ki la pyntikna ba ka dei ka metïap jong ka kynthei.
“Ki la pyntip naduh mynnin ba lap metïap na shathie, hynrei na ka liang jong ngi pat ngim shym la sangeh ka jingwad namar kito kiba lap ki ong beit ba ka dei ka met shynrang…rangbah briew hynrei mynne ynda ki pulit ki la leit tan ïa ka met, ynda la ïoh sei ki ong ba dei kynthei,” ong u Kñi katei ka samla.
U la ong ruh ba hadien katei, “ngin sa ïa leit, ngin sa ïa khmih, ngin sa ïa tba bad ka dei jong i Phibankyntiew.”
Haba pynsngew ba kam shym la don kano-kano ka jingïakajia ha ïing hasem, u la ong, “Ngim tip na kano ka daw ki phet, na kano ka daw ki long haduh katne.”
Haba kylli halor u shynrang uba la jah lang, utei u rangbah u la ong ba kim don jingtip halor jong u.
Hadien ka jinglap ïa ka metïap jong katei ka samla, ki pulit mynta ki dang wad sa ïa u samla shynrang uba la tip kyrteng kum u Wanboklang Kurbah uba la jah rngai lang ha ryngkat bad katei ka samla.
Kumba ka long mynta, ïa ka met jong ka samla Phibankyntiew la wan pynkit noh sha Civil Hospital, Shillong na bynta ban leh ïa ka ‘Post Mortem’.
