Jowai, Risaw 03
Hadien ka jingpdiang jong ki bor pynïaid district jong ka West Jaiñtia Hills District ïa ka jingdawa jong ki Karbi ban phut noh ïa ki tynrai dieng ba la thung ha Lum Moo Pyrdet Pynthor, Lapangap, ki nongshong shnong jong ka Lapangap kiba don pynthor ha Nongjrong ki la ïohlad ban leit ot ïa u kba ha ka jingsynranlang jong ki pulit ka Assam.
Haba ïakren bad u Waheh Shnong, Bah Deimonmi Lyngdoh u la ong, ha ka Sngi Ba-ar ki nongrep ka Lapangap kiba don ki hali ha Nongjrong ki la leit ban ot ïa u kba lyiur uba la ih bha.
U la ong ba la phah 74 ngut ki nongshong shnong ban leit ot ïa u kba na ar tylli ki pata ba don ha ka shnong Nongjrong. Ha kane ka jingleit ot kba la pahara ïa ki nongrep ka Lapangap da ki pulit jong ka Assam haduh ban da poi ha ki hali pynthor ki jong ki ha Nongjrong.
U la ïathuh ruh ba baroh ki 74 ngut ki nongshong shnong ki la wanphai sha Lapangap da kaba suk kaba saiñ.
