Shillong, Risaw 03
Ki nongïalam ba hakhmat jong ka Hynñiewtrep National Liberation Council (HNLC) kim pat shim kano-kano ka rai halor ka jingkyrpad ka Sorkar Jylla ban ïadon bynta lang ha ka jingïakren ïasuk.
Ïa kane la ïathuh da u ksiang ka HNLC bad President ka Hynñiewtrep National Youth Front (HNYF), Bah Sadon K. Blah.
“Kim pat shim kano-kano ka rai ban wan haduh mynta-mynne,” la ong u Bah Blah ha ka Sngi Ba-ar.
Haba ïathuh ba u ju ïakren na ka por sha ka por bad ki nongïalam ka seng, u la ong ba na ka liang jong u, u la dep pynsngew sha ki halor katei ka bynta la katto-katne por mynta.
Haba kylli, u la ong, “Kin sa pyntip na shathie haba ïadei bad kane ka liang.”
Wat la ka jingïakren ïasuk hapdeng ka HNLC bad ka Sorkar Jylla kynthup ka Sorkar Pdeng ka dang ïai bteng, ka seng ha kine ki khyndiat bnai ka la ïoh ïa ka shithi kaba la phah sha u General Secretary, uba dei ruh u Publicity Secretary ka seng, Bah Saiñkupar Nongtraw, ha kaba ka ïingkashari ka la khot hajir ïa u.
Kane, ha kawei ka liang, ka la pynlong ïa ka seng ban byrngem ha ka ban pynsangeh noh ka jingïakren ïasuk bad lada ka Sorkar ka kwah ba ka jingïakren ïasuk kan bteng, kata ka dei ban weng noh ïa baroh ki mukotduma pyrshah ïa ka HNLC bad ki dkhot jong ka.
Kham mynshuwa, u Symbud Myntri Rangbah ka Jylla, Bah Prestone Tynsong u la ong ba ka jingshah khot hajir jong ki nongïalam ka HNLC kam dei kaba la leh da ka Sorkar Jylla hynrei ka dei shi bynta jong ka jingtreikam ka ïingkashari bad kam don bynta eiei bad ka Sorkar.
Na ka liang u Bah Tynsong u la kyrpad ruh ïa ki nongïalam ba hakhmat ka HNLC ban shimkhia ïa ka jingïakren ïasuk bad ba kim dei ban don kano-kano ka jingkhuslai jingmut ha kaba ïadei bad ka shithi ba la pynmih da ka ïingkashari namarba kane ka dei shibynta ka jingtreikam jong ka ïingkashari.
Ha kajuh ka por, u la ong ba lada ka HNLC ka kwah shisha ban poi sha ka jingïakren ïasuk, na ka liang ka Sorkar Pdeng bad Sorkar Jylla ki long kiba shimkhia ban poi sha kata ka thong bad kum ka seng ka dei ban ïatreilang bad ka Sorkar lyngba u ksiang uba ka seng ka la thung bad lyngba u ksiang ba la thung na ka liang ka Sorkar.
Ha kaba ïadei bad ka jingdawa jong ka HNLC ban map ïa baroh ki mukotduma pyrshah ïa ka seng bad ïa ki dkhot jong ka, u Symbud Myntri Rangbah u la ong ba ka Sorkar kan hap ban ïakren bad ki nongïalam kiba hakhmat jong ka seng namar ba ka Sorkar Jylla bad ka Sorkar Pdeng ki da angnud shisha ban poi sha ka jingïakren ïasuk bad ka HNLC.
Shuh shuh u la kyrpad ïa ki nongïalam ba hakhmat jong ka HNLC ba kin wan shakhmat kata ïa u General Secretary ka seng, u Bah Saiñkupar Nongtraw bad u Chairman, u Bah Bobby Marweiñ ba ki dei ban don bynta lang ha katei ka jingïakren ïasuk.
Kum ban shu kdew hangne, ka seng dang ha ka taïew ba la dep ka la pyntip ba ka la thung ïa u Bah Teimiki Laloo kum u Vice-Chairman bathymmai ka HNLC hadien ka jingiehnoh kam jong u Sufiyan A. Hazarika ba la ju tip ruh kum u Manbhalang Jyrwa.
