Shillong, Risaw 03
Ki bahaïing hasem ki la dum ka buit ka stad namar kim lapdien shuh ïa u Bah Justin Sohphoh, 54 snem ka rta hadien ba ki la leit wad ïa u shaduh ki lai tylli ki district jong ka jylla Assam, kita ka Kamrup, Dispur bad Tezpur.
Haba ïakren bad u Bah Polan Sohphoh uba dei u Rangbah Kur Sohphoh Sengkmie, u la ïathuh ba ha ka 2 tarik mynta u bnai ki bahaïing hasem na Sakwang, South West Khasi Hills District ki la leit ïakynduh ïa ki pulit jong kitei lai tylli ki district ban pan jingïarap ba kin wad lem ïa u Bah Justin uba la jah na Tura ha ka 16 tarik jong u bnai ba la dep.
U la ïathuh ba ha kane ka jingleit ïakynduh ïa ki pulit sha kitei lai tylli ki district jong ka jylla Assam la synranlang da ki pulit na Meghalaya ban pan jingïarap khnang ban lap biang ïa u Bah Justin.
Nalor kane, u Bah Polan u la ïathuh ba ka kur ka hap ban shong pyrkhat biang ïa kane ka jingjah u Bah Justin hadien ba ki la wan wad ïa u shaduh Assam.
Kum ban shu pynkynmaw, u Bah Justin Sohphoh u dei u nongñiah kali jong ka shlem treikam Meghalaya Public Service Commission, Shillong. Une u briew u la leit sha Tura, West Garo Hills District ha ka 5 tarik Nailur, 2023 ban ïakynduh ïa ka lok.
Ha ka janmiet jong ka 16 tarik u Nailur u Bah Justin u la mih na ïing ban leit theh umphniang kali ha Tura bad naduh katei ka por um shym wan phai ïing shuh.
