Shillong, Risaw 03
U nongïalam ka BJP ha Meghalaya u Rikman G Momin u la shimti kum u President ha ka Sngi Ba-ar bad u la kubur ba ka kam jong u ka long kaba eh, hynrei da ka jingïatreilang yn pynkhlaiñ ïa ka seng bad ka kamram jong u ka long ban pynkhlaiñ ïa ka BJP ha kane ka Jylla.
U Rikman u la shimti kum u President bathymmai ka BJP ha ka jingïalang kaba la pynlong ha shlem treikam ka seng ha nongbah Shillong ha ka jingdon ryngkat lang u Chuba Ao uba peit ïa ka BJP ha Meghalaya nalor ki ar ngut ki MLA bad kiwei kiwei ki nongkitkam.
U Rikman u dei u nongïalam ka BJP u bym pat da paw than hynrei u dei uba la don bad ka seng naduh u snem 2014.
U la ong ba kum u President ka seng ka dei ka kamram jong u ban pynkhlaiñ ïa ka kynhun da ka jingïatreilang ki nongkitkam bad ka kynhun naduh u President barim, ki nongïalam bad nongkitkam baroh.
Haba kylli shaphang ki thong kiba u don kum u President bathymmai, u Rikman u la ong, “ka kamram jong nga ka long ban pynkhlaiñ ïa ka seng ha Jylla, ban peit ïa ka seng, lait nangta sa kaei pat nga don leh.”
Halor ka jingbym pat da pdiang bha ïa ka BJP ha Meghalaya, u Rikman u la ong ba ha ka jingmut ki paidbah ki don jingkyrmen ha ka BJP bad ki la dep ïohi ïa ki kam kiba la leh lyngba u Myntri Rangbahduh Narendra Modi.
Haba kylli haduh katno kane ka kam ka eh na ka bynta jong u kum u President, u ong ba ka dei ka kam kaba eh. “Wat la ngi don ar ngut ki MLA la jingïoh vote jong ngi ka la kiew bha bad ha kawei ka por, ngin sa jop kham bun ïa ka ar ngut.
Na ka liang u Chuba Ao u la ong ba u Rikman u dei u briew uba ïai don bad ka BJP naduh ba u la rung sha ka BJP.
Halor ka jingbujli noh ïa u Bah Mawrie, u Chuba Ao u la ong ba ka por hi ka la dei ban bujli noh, ym na kano-kano ka daw.
Haba kylli halor ka ilekshon MP na Shillong bad Tura, u Chuba Ao u la ong ba ka BJP kan sa shim rai halor kane.
Kham hashwa, u President barim, u Bah Ernest Mawrie u la ong ba ha ka jingïalang jong ka BJP ha Guwahati ha u Naitung, la ïakren ba lada ka BJP ka lah ban ïakhun bad ïoh 25 ngut ki MP na Shathei Lam Mihngi kan long ka jingmyntoi ïa ki Jylla ha kane ka thaiñ namar kin ïoh ban pynkhlaiñ ïa ka sur na Shathei Lam Mihngi ha Ïingdorbar Thawaiñ ka ri.
