Mairang, Risaw 03
Ka Hynñiewtrep Youths’ Council (HYC) North West Khasi Hills ha ka Sngi Ba-ar ka la leit ban ujor sha u Deputy Commissioner (DC) jong ka Eastern West Khasi Hills ban shim khia ha kaba ïadei bad ka jingjur jong ka jingthang rnga hapoh ka District khamtam ha ka thaiñ Lumdam, Niangdai, Wahpipa, bad Lawhuleng kiba dei ki shnong kiba dang hap hapoh ka Eastern West Khasi Hills khappud bad ka Ri Bhoi District.
Katkum ka dorkhas ba la aiti sha u DC, ka HYC ka la dawa ba dei ban pynshitom mardor ïa ki briew kiba ai bor ban thang rnga ïa ki khar Nepali hapoh ka thaiñ Niangdai, Wahpipa bad Lawhuleng.
Nalor nangta ka HYC ka la pynpaw ruh ba ka la lap hi da la ki jong ki khmat ba ki Nepali ki khlem don ïa ki kot ki sla bad khlem ka NOC na ki bor ba dei peit jong ka tnat Forest and Environment hynrei ki la pom naphang ïa ki dieng ki siej ban thang rnga. Kane ka jingleh ym tang ba ki pynjot ïa ka mei mariang hynrei la don ruh uwei u Nepali uba leh mynleh doktor jakoid ïalade hynrei da kaba leh pat ïa ki kam pohjait.
Ka HYC ha katei ka dorkhas sha u DC ka la kyntu ban shim ïa kane ka kam kumjuh ïa kitei ki bar Jylla kiba la pynjot ïa ka mei mariang bad kaba la long pyrshah ïa ka aiñ katkum ka Forest Act 1972 bad Environment Protection Act 1980.
Ka HYC ka dawa ruh ba dei ban pynshitom da kaba tyngeh bad pynngat ïa ki ha ki kyndon ïa baroh kiba don bynta khnang ba kan long ka jingsneng ïa kiwei pat ki nongpynjot ïa ka mariang.
Ka HYC haba bynrap shuh shuh ha ka dorkhas ka la kynnoh ruh ba ka jingshim sting jong ka tnat Khlaw bad ki pulit ba ïeng ha shiteng lynti ban ap pahara ka la pynshlur ïa ki nongpynjot mariang ban wanrah syndon da ki bar Jylla ban thang rnga hapoh ka District.
Ym tang katta, ka HYC ha kane ka sngi ka la leit ruh ban aiti ïa ka dorkhas sha u Syiem ka Hima Nongkhlaw ban kyntu ba un shimkhia ïa katei ka bynta.
