Shillong, Risaw:
Ha kine ki khyndiat sngi ba la dep ka kynhun hapoh ka jingïalam u Rangbah Shnong barim ka dong Nongthymmai-Lumthangding, u Bah Tarcisius Dkhar ka la leit ban ïakynduh ïa u Deputy Chief Executive Member ka KHADC, u Bah P.N. Syiem halor ki kam shnong kam thaw.
Haba kren bad ki nongthoh khubor, na ka liang katei ka kynhun ka la kynnoh ba dei ka jingbym kohnguh u Sirdar ka Elaka Laitlyngkot, u Bah Allenson Shabong ïa ki jingbthah ka Khasi Hills Autonomous District Council (KHADC) kaba la pynlong ïa ki nongshong shnong ka dong Nongthymmai-Lumthangding ban shong khlem Rangbah Shnong mynta la kumba 1 snem 4 bnai.
Na ka liang ka Executive Committee jong ka Dorbar Elaka Laitlyngkot, ha ka 02 tarik u Risaw ka la kyntait ïa katei ka jingkynnoh u Bah Dkhar bad mih ruh ban pynshai ba ka jingkynnoh ka long kaba khlem nongrim.
U Sirdar ka Elaka Laitlyngkot, u Bah Allenson Shabong, haba kren bad ki nongthoh khubor u la ïathuh ba ha ka dorbar kut snem kane ka dong ka la long ha ka 23 tarik u Jymmang, 2022 bad ki dkhot ka Executive Committee, Dorbar Elaka Laitlyngkot ki la leit ban pynïaid ïa katei ka Dorbar hynrei ka la don ka jingïatan tyllai ban jied Rangbah Shnong thymmai hapdeng ka kynhun u Rangbah Shnong barim bad ka kynhun jong uwei u rangbah uba la tip kyrteng kum u Bah Staison Kharakor.
Ha kawei ka liang, katei ka jingïatan tyllai ka pynlong ïa ka EC ban pynsangeh noh shuwa ïa katei ka kam.
U Sirdar u la ïathuh ruh ba hap ban pynsangeh shuwa ïa katei ka Dorbar Dong bad la rah ïa sha ka Executive Committee ka Dorbar Elaka Laitlyngkot ban ïa kren sani bha.
Na ka liang ka EC Dorbar Elaka, ka la shim ïa ka rai ban phah jingpynbna ba ïa ki kam ki jam baroh ha katei ka dong yn peit shwa da ka Executive Committee jong ka Dorbar Elaka Laitlyngkot bad la phah jingthoh sha u Rangbah Shnong barim ban pynphai noh ïa ki kot ki sla jong ka Dorbar Dong, u shabi ïing dong, ïa kaba haduh mynta um pat pynphai satia hynrei u la phah jingujor pynban sha ka KHADC.
Haba ïadei bad ka jingkynnoh ba u Sirdar u pyrshah ïa ka jingpyntreikam ïa ki jingtrei lyngba ka MGNREGA, na ka liang u Bah Shabong u la ong ba um pyrshah ïa ka roi ka par bad ka jingpyrshah ka lah ban wan na kiwei ki nongshong shnong.
Na ka liang u Rangbah Shnong ka Dong Ïewshyllong, u Bah Ryngkat Lyndem, u la ong ba bunsien hi kano-kano ka Dorbar Dong ha ka Elaka ka pdiang ïa ki rai kiba la shim ha ka Executive Committee Dorbar Elaka Laitlyngkot.
Shuh shuh u Bah Rokes Kharbuli, Assistant Secretary ka Executive Committee Dorbar Elaka Laitlyngkot u la bynrap ba ka la don ka jingdawa phiah noh artylli ki dong ïa ka dong Nongthymmai-Lumthangding bad ïa kane ka kam yn dang peit bniah.
