Jowai, Risaw 04
Na ka daw ka jingbym ïoh tulop naduh u Nohprah mynshem snem, palat 500 ngut ki nongtrei jong ka Jaiñtia Hills Autonomous District Council (JHADC) kiba don hapoh ka synjuk jong ka JHADC-Staff Association ki la pynlong ka jingïakhih kaba jai-jai da kaba shong kyllaiñ mungor ha phyllaw ka shlem treikam jong ka JHADC ha nongbah Jowai.
Ha kane ka jingïakhih ba la pynlong ha ka Sngi Balang la sakhi ba ki nongtrei ka JHADC ki la bat lang ïa ki jingthoh placard kiba ong, “Ngi dawa ïa ka hok, ngi don ki longïing longsem ngin nym im khlem ka tulop, ka tulop ka dei ka hok jong ngi nalor kiwei kiwei de ki jingthoh.”
U President ka JHADC-Staff Association, Bah Johnson Pohrmen haba kren sha ki lad pathai khubor u la ong, ka jingshong kyllaiñ mungor jong ki ym dei ba ki pyrshah sorkar, hynrei ka long kum ka dak ban pynpaw ïa la ka jingdukha mynsiem halor ka jingbym ïoh tulop mynta la 10 bnai kynthih naduh u Nohprah 2022.
“Ka long kaei kaei kaba pynsngewdiaw ïa ngi kum ki nongtrei kane ka District Council namar la 10 bnai ngim shym la ïoh tulop satia bad ka la buh ïa ngi ha ka jingeh kaba khraw ban bsa ne ban pyndap pynbiang ha ïing ha sem”, la ong u Bah Johnson Pohrmen.
U la bynrap ba ha kaba ïadei bad ki jingdonkam kiba kyrkieh kum ha ka pang ka shitom, ki nongtrei ki hap ban kit ram na ki riewshimet namar na ki bank kim ïoh jingshaniah shuh namar ka jingbym ïoh tulop.
U la pynkynmaw ruh ba u Symbud Myntri Rangbah ka Jylla, Bah Sniawbhalang Dhar ha ka 16 tarik Jylliew (June) 2023, u la kular ban ïarap pyllait ïa ka tulop ba dang sah jong ki nongtrei ha ka taïew kaba nyngkong jong u Nailur (September) 2023, hynrei kane ka jingkular ka jong u kam shym la urlong satia. Kumta u la kyrpad ïa ka sorkar ban siew dep ïa baroh ka tulop kaba dang sah khnang ban suk ïa ki nongtrei jong ka council. U la ong ruh lada ka sorkar ka sngap mynthi ïa kane ka jingkyrpad ka jong ki, kin shim da kawei pat ka sienjam kaba tyngeh ban pynbor ïa ka sorkar ban siew dep ïa baroh ka tulop jong ki.
