Jowai, Risaw 04
Bunsien ki pulit Assam ki long ki nongpynthut ïa ki Khasi Pnar kiba shong ba sah ha ki jaka kajia khappud na ki daw kiba bun. Pynban mynta ka kynti, ki la hap ban synran bad pynbiang ïa ka bor pahara ïa ki nongshong shnong ka Lapangap ban ïoh lum ïa u kba u khaw na ki pyntha ban pyndap smam ïa ka thiar ban ïoh bam ha baroh saw aïom.
La sakhi ba ki pulit ka Assam ki la pyntrei kam hok ïa kaei kaba la rai da ki ar DC, kata ka West Karbi Anglong bad West Jaiñtia Hills District kaba long ha ka 28 tarik u Nailur hadien ka jingïasiat jri u paid Karbi bad Pnar.
Ki nongshong shnong jong ka shnong Lapangap ki la sdang ïa ka jingot kba sha ki pynthor kiba don ha Nongjrong haba 74 ngut ki la leit ot ïa u kba ha ka jingsynran ki pulit Assam ha ka 3 tarik Risaw.
Ha ka sngi kaba bud, kata 4 tarik Risaw, ki nongshong shnong ka Lapangap ki la bteng biang ïa ka jingot kba ha ki pynthor kiba don ha Umchyrngan bad Lakawang kaba hapoh u pud u sam ka Lapangap.
Katba ki pulit Assam ki la shong pahara na shiliang lum khnang ban lait na kano-kano ka jingjia.
Haba ïakren bad u Waheh Shnong u Bah Deimonmi Lyngdoh u la ïathuh ba lashai ka sngi Palei ki nongshong shnong ka Lapangap kiba don hali ha Nongjrong kin leit ban ot biang ïa u kba jong ki sha Nongjrong.
Lah ban kdew ba ka jingïapyni bor hapdeng ki ar jaidbynriew kata ki Karbi bad ki Pnar da ka jingïasiat jri markylliang bad ki Karbi ki pyndonkam da u khnam bad ryntih ha ki thaiñ Lapangap-Tahpat ka la jia ha ka 26 tarik bad 27 tarik Nailur bad ha ka 28 tarik Nailur ki bor pynïaid District jong ki ar District, ka West Karbi Anglong Assam bad ka West Jaiñtia Hills District, Meghalaya kila pynlong ïa ka jingïakynduh bad ki ar jaidbynriew ha ka shnong Lapangap.
Ha katei ka jingïakynduh, ka DC West Karbi Anglong ka la ai khubor halor jingmynjur jong ki Karbi ryngkat bad ka kyndon kaba long ban phut noh ïa ki symbai dieng bala thung da ki nong Lapangap.
U DC jong ka West Jaiñtia Hills District ula mynjur ïa katei ka kyndon bad ha ka 29 tarik Nailur u la hukum ïa ka ophis Basin ba kan phut noh ïa baroh 70 hajar ki tynrai ki dieng ba ai da ka MegLIFE project (JICA) ïa kiba la thung da ki nongshong shnong ka Lapangap.
