Shillong, Risaw 03
Kan dei ka sien banyngkong ba ka BJP ha Meghalaya ka ïoh ïa u President na Ri-lum Garo lyngba u Rikman G Momin.
Baroh shikatta snem, kiba shimti kum u President ka BJP ha Meghalaya ki dei beit na Khasi Jaiñtia.
Ka BJP ka la ïoh teng ruh ïa u MLA na Ri-lum Garo lyngba u Nityanarayan Simchang uba shahjied kum u MLA ka BJP na Dalu konstitwensi ha u snem 1998.
Ka jingthung ïa u Rikman Momin kum u President ka wan ha ka por ba ki seng saiñ pyrthei kynthup ka BJP ki la sdang pynkhreh ïa ka ilekshon MP ha u snem 2024.
Ki nongïalam ka BJP ki la sngew ïahap lehse ban don noh da u nongïalam na Ri-lum Garo namarba la bun phew snem u nongïalam bahakhmat dei na Rilum Khasi Jaiñtia.
Kane kan dei ruh ka sien banyngkong ba ki nongïalam ha ka saiñ hima ki mih bun na Ri-lum Garo ban don ha ki kyrdan kum u Myntri Rangbah, Lamphang ka Ïingdorbar Thawaiñ, bad kiwei.
Ka jingthung ïa u Rikman kum u President ka BJP ka lah ruh ban pynmih jingkylli haba ïadei bad ka saiñ hima ha Ri-lum Garo. Ka BJP kam don MLA na Ri-lum Garo bad ki MLA kiba kham bun ki dei ki MLA ka NPP.
La ka jingthung ïa u Rikman Momin kum u President ka dei kaba don jingthmu saiñ hima ne em, ka por kan sa batai.
