Gangtok, Risaw 04
Kumba 10 ngut ki ‘riew paidbah ki la khlad katba 82 ngut kiwei pat ba kynthup ïa 22 ngut ki shipai India, ki dang jah rngai hadien ba u slap uba jur u la pyndap ïa ka wah Lhonak ha North Sikkim kaba la wanrah pat ïa ka jingshlei um kaba jur ha ka wah Teesta.
Uwei u heh jong ka sorkar Sikkim u la pyntip ba kumba 14 tylli ki jingkieng ki la dkut noh katba palat 3,000 ngut ki nongjngoh kai pyrthei ki la sahkut ha ki bynta bapher bapher jong ka jylla.
Kane ka jinghap slap kaba jur ka la jia ha ka por mynstep jong ka Sngi Balang bad ka um ka la pynjulor ïa ka Dam ha Chungthang kaba dei ka shlem pynmih bording kaba heh tam ha Sikkim, bad kane ka la nang pynjur ïa ka jingshlei um.
Ha kane ka sngi, ka pyntip ba ki la don haduh 23 ngut ki shipai India kiba la jah na Bardang hajan ka sor Singtam, bad uwei na ki, la ïoh ban pyllait im.
Uwei u heh jong ka sorkar Sikkim u la pynthikna ba 10 ngut ki briew ki la khlad katba 82 ngut ki dang jah rngai.
“Ki don 14 tylli ki jingkieng – khyndai tylli jong ka Border Roads Organisation bad san tylli jong ka sorkar jylla – kiba la julor bad ki la khyllem. Nalorkata, ki don palat 3,000 ngut ki nongjngohkai pyrthei kiba la sahkut ha ki bynta bapher-bapher ka jylla,” la ong utei u heh sorkar.
Ki don kumba 14 ngut ki nongtrei ha ka Teesta Stage 3 Dam ha Chungthang kiba la sahkut hapoh ki jaka treikam jong ki.
Ka jingmynsaw bad ka jingjah rngai jong ki nongshong shnong ka la long ha Chungthang jong ka Mangan distrik, Dikchu bad Singtam ha Gangtok distrik, bad Rangpo ha Pakyong distrik.
Ha kawei pat ka liang, ki shipai ka Trishakti Corps ki la pynlong ïa ka jingthwet kaba jur ïa ki 23 ngut ki shipai kiba la jah rngai. Hapdeng ka jinghap jong u slap uba jur, ki shipai ki la wad bad ki la lap ïa uwei napdeng ki 23 ngut ha ka por janmiet bad ka jingwad ïa 22 ngut kiwei pat ka dang bteng.
