Bangalore, Risaw 04 (CBCI)
U Cardinal Telesphore Placidus Toppo, u Archbishop ba la shongthait ka jylla niam-bah Ranchi, u la khlad noh ha ka Sngi Balang ha ka rta kaba 84 snem.
Katkum u kyrwoh khubor na ka CBCI, la ong ba utei u Cardinal u la khlad ha ka por 3:45 janmiet ha Constant Lievens Hospital, Mandar, Ranchi na ka daw ki jingshitom kiba la ban namar ka jinglong tymmen kiba la neh la katto katne bnai.
La kha ïa u Cardinal Toppo ha ka 15 tarik Risaw, 1939 ha Jhargaon kaba dei ka shnong kaba hap ha Chainpur Parish ha Gumla distrik.
Ha ka 8 tarik Jymmang, 1969, la kyntang Lyngdoh Sohblei ïa u Cardinal Toppo da u Bishop Franciskus ha Basel, Switzerland. U la wan phai sha India bad u la shah thung kum uwei na ki nonghikai ka St. Joseph’s High School, Torpa. Hadien kata, u la long u Acting Principal jong ka skul. Nalorkata, ha u snem 1976 u la seng ïa ka Lievens’ Vocation Centre, Torpa, bad u la long u Director. Hadien katto katne, u la shah thung kum u Secretary u Archbishop ka Ranchi, u Pius Kerketta.
Ha ka 8 tarik Jylliew, 1978, la jied ïa u Cardinal Toppo ban long kum u Lyngdohsad (Bishop) ka jylla-niam Dumka ha kaba ki kyntien phira jong u ki long: “Prepare the way of the Lord.” La kyntang Lyngdohsad ïa u ha ka 7 tarik Risaw, 1978 da u Archbishop Pius Kerketta ha St. Teresa Girl’s School, Dudhani.
Ha ka 8 tarik Naitung, 1984, u la shah jied ha u Pope St. John Paul II ban long kum u Coadjutor Archbishop ka Ranchi. U la shah thung pura kum u Archbishop ka Ranchi ha ka 7 tarik Nailar, 1985, bad ïa ka jingpynskhem ïa u kum u Archbishop la pyndep ha ka 25 tarik Nailar, 1985.
Nalorkata, u shah jied kum u President ka Conference of Catholic Bishops of India (CCBI) ar sien kynthih, kata, naduh u snem 2001-2004 bad 2011-2013. U la long ruh u President ka CBCI naduh 2004-2008.
U Pope St. John Paul II u la ai burom ïa ki riewlum ka Jharkhand da kaba pynkiew kyrdan bad thung ïa u Archbishop Telesphore Toppo kum uwei na ki Cardinal ha ka 21 tarik Risaw, 2003. Na ka dewbah Asia, dei tang u Cardinal Toppo uba la poi sha kane ka kyrdan napdeng ki riewlum. Kum u Cardinal, u la leit ban ïashim bynta ha ka jingjied ïa u Pope Benedict XVI ha u Ïaïong 2005 bad ïa u Pope Francis ha u Lber 2013.
U Pope Francis u la pdiang ïa ka shithi iehnoh kam jong u Cardinal Toppo kum u Archbishop ka Ranchi ha ka 24 tarik Jylliew, 2018. Ka CBCI ka la ong ba u Cardinal Toppo u la long kum u Lyngdoh Sohblei la 54 snem, kum u Lyngdohsad la 44 snem bad kum u Cardinal la 19 snem.
