Shillong, Risaw 04
Ki dkhot jong ka Academic Council (AC) ka skulbah North Eastern Hill University (NEHU) ki la dawa na u Vice Chancellor bad Chairman jong ka Academic Council u Prof. P Shukla, ba un khot noh mardor ïa ka jingïalang ba kyrkieh ban ïoh ïatai halor ka jingkynnoh pyntreikam khlem ïahap ïa ka National Education Policy (NEP) 2020 ha ka kyrdan Under Graduate na ka bynta ka samoi 2023-24 khlem ka jingmynjur ka Academic Council.
Ha ka kyrwoh khubor ba la pyllait da u dkhot ka Academic Council u Prof. Lakhon Kma u la ong ba kane ka jingshim da kane ka rai ban dawa na u Vice Chancellor ka dei hadien ka jingleh bym mon bad ka jingbym kwah jong u VC ban khot ïa ka jingïalang jong ka Academic Council wat hadien bun tylli ki jingkyrpad ba la buh da ki nonghikai.
U Prof. Kma u la ong, “Ki dkhot ba don jingkitkhlieh jong ka Academic Council ki sngewkhia jur halor ka jingkyntur ïa u pud ba ïadei bad ka bor jong ka AC bad ka jingpynkheiñ ïa ki kyndon bad rukom treikam katkum ka NEHU Act, Statutes bad Ordinance”.
“Kumta, ki dkhot ki la bthah ban khot ïa ka jingïalang ba kyrkieh jong ka Academic Council ban ïakren halor ka jingpyntreikam ba khlem ïahap ïa ka NEP 2020 ha ka kyrdan UG ha ki kolej ba la pynïasoh bad ka NEHU khlem da ïoh ïa ka jingmynjur jong ka Academic Council katkum ka Regulation RA-5, Clause 13, under Clause (1) (a) bad (2) of Statute 42,” la ong u Prof. Kma.
Nalor kane u la ong ba ki dkhot ka Academic Council kim kwah satia ban ïakren halor ka jingpynsangeh noh ïa ka jingtreikam ka NEP hynrei halor ka jingdonkam kyrkieh ban pynbeit ïa ki rukom pynïaid ba bakla.
Palat 100 ngut ki dkhot jong ka Academic Council na Shillong bad Tura Campus ka NEHU ki la ïasoi ïa ka jingdawa ban khot ïa ka jingïalang ba kyrkieh ka AC, kaba long palat ïa ka jingdonkam paid ba shipawa na ka laipawa ka jingdon ki dkhot ka AC katkum ka Regulation RA-5, Clause 13, under Clause (1) (a) bad (2) of Statute 42, la bynrap biang u Prof. Kma.
