Shillong, Risaw 04
U Rangbah Kur Sun, Bah E.L Sun u la ong ba ka jingslem ban pyndep post mortem ïa ka Phiban-kyntiew Sun ka dei namar ki ïoh jingtip ba ki bahaïing jong u shynrang u Wanboklang Kurbah kin nym leh post mortem hynrei hadien ba ki la ïakren bad ki pulit ki la pyntip ba ïa ka post mortem hap leh baroh ar ngut.
Kumta u Bah Sun ryngkat ki Rangbah Kur ki la shah ban post mortem ïa kane ka kynthei kaba la buh ïa ka metïap naduh ka miet jong ka 3 tarik u Risaw ban kohnguh ïa ka jingbthah ki pulit kumba ki la aiti naduh basdang ba ki jah na ïing.
Hadien ba la dep post mortem la rah ïa ka metïap jong ka Phibankyntiew Sun sha jaka thang ka Seng Khasi Marbisu.
Ka jingpynbeit ban post mortem ïa ka Phibankyntiew ka dei ban sdang naduh ka por 10 baje mynstep, hynrei namar ki pulit Mawngap ki dang bun kam haba la lap sa ïa u shynrang uba ki la jah lang, kumta ka la kham suki. Dei tat ha ka por 12:30 shiteng sngi la wan ki pulit kynthei na Sadar Police Station ban peit bniah ïa ka met jong kane ka kynthei.
Hadien ba la dep peit bniah da ki pulit kynthei, ki bahaïing hasem ki la pyntip ba ka Phibankyntiew Sun ka don dak mong na khlieh ka long kumba ka la pait bad jngem ka met.
Ki pulit ki suba ba ka samla kynthei ka la noh ïap palat shi taïew eiei namar u ñiuhkhlieh u la hap lut.
Haba u nongthoh khubor uba don lang ha phyllaw ka Civil Hospital Shillong la ïohi ba ki bahaïing jong ka Phibankyntiew ki la leit sha ophis Deputy Commissioner East Khasi Hills ban kyrpad pyllait noh ïa ka post mortem.
Pynban dei haduh ka por 3 baje janmiet ki bahaïing ki la shah ïa ki doktor ban post mortem ha jingïadonlang ki pulit Mawngap bad mar shu dep ha ka por 4:30 janmiet ki la rah beit sha u lum jingthang ka Seng Khasi Marbisu.
Kum ban shu pynkynmaw ka samla Phibankyntiew Sun kaba dang 18 snem ka rta ka la jah na ïingsah ha Marbisu ha ka 20 tarik u Nailur ryngkat u Wanboklang Kurbah ba dang 20 snem ka rta kiba dang pule ha St. Paul Marbisu, East Khasi Hills District.
Hadien ba la jah artaïew tam la lap ïa ka Phibankynriew ha ka 3 tarik Risaw bad ha ka step jong ka 4 tarik Risaw, 2023 la lap sa ïa ka met jong u shynrang u Wanboklang.
