Shillong, Risaw 04
Ka jingpynkhreh ka Jylla na ka bynta ka ilekshon sha Ïingdorbar Lok Sabha ka la sdang bad ïa mynta, la pynleit jingmut shwa haba ïadei bad ka jingpynbiang ïa ka thup kyrteng ki nongthep vote nalor ka jingpynbiang bad khmih bniah ïa ki kor thep vote (electronic voting machine).
Na ka liang u Chief Electoral Officer (CEO), u BDR Tiwari u la ïathuh ba ha kane ka jingïalang kaba donlang ki Deputy Commissioner bad kiwei ki ophisar, la ïakren kham bniah shaphang ka thup kyrteng ki nongthep vote bad ka jingpeit bniah ïa ki kor thep vote.
U la ong ba katkum ka jingpynbeit, ïa ka thup kyrteng jong ki nongthep vote kaba dang donkam ban pynbeit biang yn pynmih ha ka 17 tarik Risaw bad ïa ka thup kyrteng kaba pura yn pynmih ha ka 5 tarik Kyllalyngkot, 2024.
Ka Election Commission ka la pynmih ïa ka jingbthah ha ka 29 tarik Jymmang, 2023 sha baroh ki Jylla ban nang pynbit pynbiang noh ïa ka thup kyrteng ki nongthep vote ha kaba ka jingshim jingkheiñ kan dei naduh ka 1 tarik Kyllalyngkot, 2024.
Kiwei ki Jylla kum ka Chhattisgarh, Madhya Pradesh, Mizoram, Rajasthan bad Telangana ki hap ïaid la kajong namarba kine ki Jylla ki hap pynlong noh shen ïa ka ilekshon sha Ïingdorbar Thawaiñ jong ki mynta u snem.
Ha ka ilekshon sha Ïingdorbar Lok Sabha ha u snem 2024, ka Meghalaya ka don ar tylli ki konstitwensi, ka Shillong bad Tura Lok Sabha Konstitwensi.
