Shillong, Risaw 04
U Bah Shemphang Langstieh, 45 snem ka rta u la phla ba u la ïakynduh khatduh ïa ka khun kynthei ka Phibankyntiew Sun haba rakhe sngikha ha ka 17 tarik Nailur, 2023 haba ka dap 18 snem thik ha ïingsah ha Marbisu, Mawphlang Block, East Khasi Hills District.
Haba ïakren bad u Bah Shemphang katba dang ap ban post mor-tem ïa ka Phibankyn-tiew, u la ïathuh ba ha ka sngi rakhe sngikha u la shet pyntiew ban ïa bam shi ïing shi sem, hynrei dangstep ha ka sngi nyngkong kaba dei 18 tarik Nailur 2023 u la mih na ïing ban leit bylla, hynrei ha ka Sngi Balang 20 tarik Nailur u ïoh jingtip ba ka khun ka la jah na ïing.
U Bah Shemphang u la ïathuh ba u don lai ngut ki khun. Kaba nyngkong dei kane ka khun kynthei kaba la khlad, ba ar dei khun shynrang ba dang 8 snem bad ba khatduh dei khun shynrang ba dang 3 snem.
Shuh shuh u la ïathuh katba donkam ka khun um ju pynsngewsih hynrei u kwah ban pynsngewbha lada ka kwah ban thied ki jaiñ ki nep, ki jingbam hynrei um poi pyrkhat ba ka khun kam shym la kren eiei ïa u shwa ba kan jah na ïing haduh ban da khlad na kane ka pyrthei.
U la ïathuh ba ha kane ka jingrakhe sngikha kane ka khun kynthei kam kwah ban da khawai ba kham heh namar ba ka dang dap 18 snem ka rta, hynrei ka kwah ba kan khawai kham heh ynda la kynjoh sha ka 20 snem.
“Kam shym la ïathuh ba ka don jingïadei bad une u shynrang ba ka la jah lang namar ka khun kaba dang leit klas” u la ong.
U la pyntip ba ha ka 18 tarik Nailur haba u mih na ïing u la mih dangstep, hynrei la shu ïoh ïa ka khubor ba ka khun kam shym la wan ïing shuh.
Nalor nangta u la pyntip ba ha ka 20 tarik u Nailur, ka Phibankyntiew mar shu wai klas ka la wan shwa ha ïing bad ka la mih biang na ïing ha ka por 4 baje janmiet bad naduh kata ka por ki bahaïing kim ïoh jingtip shuh.
