Shillong, Risaw 04
Ka Sorkar Jylla ka la pan por kumba artaïew ban ai jingtip halor ka jingbit jingbiang ki jaka thang briew ha ki nongbah bad kiwei ki jaka ka Jylla.
Ka Sorkar Jylla ka la buh ïa kane ka jingkyrpad hakhmat ka Ïingbishar Meghalaya High Court kaba la shim ban bishar ïa ka mukotduma kaba ïadei bad ka jaka thang briew ka Seng Khasi Hima Mawsynram ha ka Sngi Ba-ar.
Ka Ïingbishar lyngba u Chief Justice, Sanjib Banerjee bad Justice, B. Bhattacharjee ka la ong ba namarba ka Sorkar Jylla ka pan por ban ai jingtip halor ka jingbiang ki jaka thang briew ha ki nongbah bad kiwei ki bynta ka Jylla, la buh biang ban shim bishar hapdeng artaïew bad ka sngi ban shim bishar kan dei ha ka 19 tarik Risaw.
Ka Ïingbishar ka la pynwan kum ka Public Litigation Interest (PIL) hadien ba la don ka shithi ujor kaba la phah da ka Seng Khasi Hima Mawsynram sha u Chief Justice ha ka 8 tarik Nailur, 2023.
“Ka long kaba donkam ban pyntikna ba kin biang ki jingdonkam (adequate facilities) ym tang ha Shillong hynrei ha kiwei ki bynta ka Jylla ban don ka jaka thang briew kaba paka na ka bynta ban pyndep ïa kaba sah,” la ong ka Ïingbishar lyngba ka jingbthah kaba la pynmih ha ka 22 tarik, Nailur.
Kum ban pynkynmaw, u President ka Seng Khasi Hima Mawsynram, u la thoh shithi sha u Chief Justice ha ka 8 tarik Nailur ban kyrpad ban shim hi da ka Ïingbishar ban bishar namar ka jingpynjah ïa ki kot ki sla kiba la don bad ka Sorkar Jylla lyngba ka tnat Planning, Investment Promotion & Sustainable Development haba ïadei bad ka jingmang pisa ban tei ïa ka jaka thang briew jong ka Seng Khasi Hima Mawsynram, Mawsynram Syiemship ha Kenmynsaw, ha shnong Synteiñ, East Khasi Hills District.
