Nongpoh, Risaw:
Ka Myntri ba khmih ïa ka tnat ka koit ka khiah ka jylla ka Kong Ampareen Lyngdoh ha ka Sngi Ba-ar ka la plie paidbah ïa ka jaka ai jingsumar tynrai lyngba ki dawai kynbat ha ka shnong Pahamsyiem ïa kaba la tei lyngba ka jingïarap bei tyngka jong ka sorkar jylla ha ka jinglut kaba T.8 lak lyngba ka tnat Bio-Resource Development Center (BRDC), Shillong.
Ïa kane ka jaka ai jingsumar tynrai la tip kum kata ka Meghalaya Traditional Healing Clinic (MTHC) kaba hap hapoh ka jingpeit jingkhmih jong ka Ri Bhoi Traditional Healer Association (RBTHA).
Ha kane ka sngi la ïadon lang u MLA ka Nongpoh Bah Mayralborn Syiem, u MLA ka Umsning Dr. C Lyngdoh, u MDC ka Nongpoh Bah Balajied Rani, u Joint Secretary ka sorkar jylla bad Member Secretary ka BRDC, u Gunanka DB lem bad ki nongïalam ka RBTHA.
Ka Myntri haba ai jingkren ha kane ka sngi ka la pynpaw ïa ka jingsngewkmen ban ïohi ba katei ka jaka ai jingsumar ka la ïeng ha katei ka jaka ban sdang ai ïa ka jingshakri sha ki paidbah na ka bynta ban sumar bad pynkoit ïa ki jingpang bapher bapher. Nalor kata, ka kyntu ruh ïa ka RBTHA ba kan lum kan lang ïa baroh ki nongsumar tynrai ba kin don lang ha kajuh ka shatri ban pynim ïa katei ka rukom sumar tynrai lyngba ki dawai kynbat.
Nalor kane, ka la ïathuh ruh khamtam ha ki thaiñ nongkyndong, la ju ïohi ïa ki doktor bad ki nos dang ha ki khyndiat phew snem kiba la dep, bad la shu shaniah beit ha ki dawai kynbat tynrai ban pynjem ïa ki jait jingpang bapher bapher, hynrei mynta kane ka la sdang ban duh jait noh. Kumta ka la pynpaw ba la donkam ban pynim biang ïa kane ka rukom ai jingsumar kaba pyndonkam da ki dawai ki bym ktah ïa ka met jong u briew, ym kum ki dawai phareng kiba lah ban ktah shikatdei ïa ka met u briew.
Ka la pynpaw ruh ba kan shimkhia ban ïakren bad ka BRDC na ka bynta ban pynïar bad pynheh shuh ïa katei ka jaka ai jingsumar khnang ba kan lah ban ai ïa ka jingshakri kaba kham bha shuh shuh sha ki paidbah.
Katba na ka liang u Bah Mayralborn Syiem bad u Dr. C Lyngdoh haba ai jingkren ki la ong ba ka rukom sumar tynrai ka dei kaba kham kyrpang ha kaba ki nongsumar ki don ïa ka jingstad kaba kyrpang ban sumar ïa ki jait jingpang bapher bapher bad ba ka long kaba donkam ban pynim biang ïa katei ka rukom sumar tynrai wat lada bun na ki paidbah ki la sdang ban shaniah bad leit sumar sha ki doktor ha ki hospital bapher bapher.
Ki la kyntu ruh ïa ki nongsumar ba ki dei ban long phikir bad nym leh shlur ha kaba ïadei bad ki jait jingpang kiba kham ma, hynrei ba ki dei ban sumar katkum ka bor jong ka jingtip bad ka jinglah ka jong ki bad khamtam ba kin ïatreilang ryngkat-ryngkat bad ki bor hospital na ka bynta ban leh ïa ki nongmuna ban tip ïa ki jait jingpang. Na ka liang kitei ki nongmihkhmat, ki la pynpaw ruh ïa ka jingkhmih lynti ba katei ka jaka ai jingsumar tynrai, kan lah ban ai ïa ka jingshakri kaba paka tam sha ki paidbah ka thaiñ ban pynkoit ïa ki jait jingpang bapher bapher.
Katba u Bah Balajied Rani u la pynpaw ba ka Khasi Hills Autonomous District Council (KHADC) ka don ïa ka bynta kaba khraw ban pynïoh ïa ka jingithuh ïa katei ka rukom ai jingsumar tynrai bad na ka liang ka jong u, u la don bynta naduh kaba sdang bad ka RBTHA ba kan ïoh ïa ka jingithuh.
U Bah Jasper Manih, President ka RBTHA u la pynpaw ba ka jinglah ban plie paidbah noh ïa kane ka jaka ai jingsumar tynrai ka dei kaba ki nongsumar Khasi tynrai ki la phohsniew la slem khnang ba yn lah ban pynim bad pynneh pynsah ïa ka rukom ai jingsumar tynrai lyngba ki dawai kynbat kaba la hikai da ki longshwa manshwa kiba la sdang ban duh jait ha kine ki sngi kiba mynta.
