Shillong, Risaw:
Hadien ba ka heprit Mansa Najiar kaba dang 12 snem ka rta bad kaba dang pule klas VII-A ha B.K. Bajoria Higher Secondary School dangshen ka la wanrah nam ïa ka ïing ka sem bad ïa ka jylla hi baroh kawei da kaba ïohpdiang ïa ki khusnam bapher bapher namar ka jingthoh ïa ka kot kaba la shah jied ha ka rynsan thoh kot bad pynmih kot jong ki khynnah rit kaba paw bha hapoh ka pyrthei ïa kaba la tip kyrteng kum ka Bribooks. Kane ka Bribooks ka la jied ïa ka kot jong katei ka khynnah ban die ha kylleng ka pyrthei. Kumta halor kane ka bynta na ka liang ka United Democratic Party (UDP) State Youth Wing ha ka 2 tarik u Risaw 2023, ka la pynkup burom ïa katei ka heprit kum ka dak ka jingai mynsiem ïa ka kaba la long ha ka shlem treikam ka seng kaba don hajan ka Shillong College.
Ka heprit Mansa Najiar ka dei ka khun jong ka Kong Marleki Najiar bad u Bah Felix Pakynteiñ kiba shong ba sah ha Nongmensong. Ka kyrteng jong ka kot kaba ka Mansa ka la thoh ka dei kaba la tip kyrteng kum ka “A Hero’s Destiny, Everland” bad ka la shimpor ban thoh pyndep ïa katei ka kot tang hapoh 4-5 sngi eiei.
Kum ban shu kdew hangne, ka Mansa ka la leit ban shim ïa katei ka khusnam ba la ai da ka Bribooks kaba la long ha Gurugram, Haryana. Kaba kham pynsngewsarong shuh shuh ïa ka jylla ka long ba napdeng kiwei kiwei pat ki khynnah skul napoh kane ka jylla kiba la ïashimbynta lang ha katei ka jingïakob thoh kot jong ki khynnah, ka Mansa ka dei tang ma ka marwei kaba la shah jied ban ïohpdiang ïa katei ka khusnam na ka kompani Bribooks.
Haba ai jingkren ha kane ka jingïalang pynkupburom ïa ka Mansa, na ka liang u Bah Titosstarwell Chyne, u MDC ka Sohra konstitwensi, u la ong ba ka long kaei-kaei kaba pynsngewsarong ïa ka jylla baroh kawei namar dang ha ka rta kaba dang 12 snem, katei ka heprit ka la lah ban thoh bad pyndep ïa katei ka kot jong ka tang hapoh katto-katne sngi.
Ha katei ka jingpynkup burom ïa ka heprit Mansa, la ïadon ryngkat lang da u Bah Process T. Sawkmie, u MLA barim ka Mawlai konstitwensi, u Bah Eugeneson Lyngdoh kum u MLA barim ka Mawphlang konstitwensi, ki nongkitkam ka seng bad ki bahaïing hasem ka heprit Mansa Najiar bad kiwei kiwei.
