Nongstoiñ, Risaw 04
Ha ka Sngi Balang ka Hynñiewtrep Achik National Movement (HANM) West Khasi Hills District, ka la shim ïa ka rai ban pyntreikam hi noh ïa ka Inner Line Permit (ILP) hapoh ka West Khasi Hills.
U President ka HANM West Khasi Hills, Bah Willstone Sohshang u la ong, ïa katei ka rai la shim ha ka jingïalang jong ka Executive Committee ha kaba da kawei ka jingmut la shim ïa ka rai ban pyntreikam hi noh.
U Bah Willstone u la ong ruh ba nangne shakhmat ka HANM kan sdang noh ïa ka jingpyntreikam hi ïa ka ILP hapoh ka District da kaba kan khynra naphang ïa ki bar jylla bad ïa ki bym biang bad don ïa ki kot ki sla kiba biang. Kumta na ka liang jong ka seng kan ym map bad kan beh krad ïa ki sha ka jaka ba ki wan ne shong ba ki sah.
Nalor kane, u la ong ruh ba kaba la pynlong ïa ka HANM ban shim ïa katei ka rai ka dei halor ka jingïohi jong ka seng ïa ka jingnang jyllei jong ki bar jylla kiba la sdang kharoi sted bha hapoh ka distrik ha kaba ym ithuh ithaw shuh la ki dei ki ophisar ne ki nongtrei sorkar ne ki nongbylla sngi. Kane kan sa ap jingma pat ïa ka shongsuk shongsaiñ bad ka lah ruh ban ktah ïa ka bylla ka sngi bad ka khaïi pateng jong ki trai jylla.
U la ong ba ka jingdon jong lai tylli ki projek shna surok hapoh ka distrik ba kynthup ïa ka Nongstoiñ-Rambrai, Nongstoiñ-Maweit bad Nongstoiñ-Wahkaji ka la pynlong ruh ïa ki bar jylla ban shim kabu ban wan bsuh khlieh hapoh ka distrik.
Nangta shuh shuh u Bah Willstone u la ong ruh ba ka HANM ka kren shai ïa ki kam kiba wan trei ki bar jylla ïa kaba u Khasi ne u trai Jylla kim lah ban trei, ka HANM kam da thew than. Pynban kumba ka long mynta bun ki kam ki Khasi lane ki trai Jylla ki lah ban trei ïa ki kam ba wan trei ki bar jylla bad ka HANM kan ïai ïakhun namar kam kwah ba kane ka jingjyllei ki bar jylla kan suhthied haduh pdeng sor Nongstoiñ.
“Ka HANM ka pynpaw ïa ka jingsngewsih halor ka jingsngap man-man ka sorkar pdeng halor ka jingdawa ka Bri u Hynñiewtrep baroh kawei ban pyntreikam pura noh ïa ka ILP hapoh ka Jylla Meghalaya bad dei lyngba kane ka jingpynslem, ka HANM kam banse ban hap shim noh ïa ka jingkitkhlieh na ka bynta ka jingshngaiñ ka pateng ban wan,” u la ong.
Khatduh khatwai eh ka HANM ka kyntu ïa ki nongïalam Hima, ki nongïalam shnong bapher bapher ba kin long kiba peitngor bad ban ai ka jingïatreilang bad ka seng.
