Shillong, Risaw 04
Ki bahaïing hasem khlem shongthait ki la wad ïa ka met jong u samla Wanboklang Kurbah (20 snem ka rta) uba la jah lang ha kajuh ka sngi bad ka samla Phibankyntiew Sunn (18 snem ka rta) kiba shong ba sah ha ka thaiñ Marbisu, East Khasi Hills.
Hadien ba la lap ïa ka met jong ka samla kynthei – Phibankyntiew Sunn ha ka Sngi Ba-ar, na ka liang ka shnong ha ryngkat ki bahaïing hasem da ka jingsuba ba ka met jong u samla shynrang ka lah ban don shajan katei kajuh hi ka jaka, ki la leit ban wad ïa ka.
Ha katei ka jingwad jong ki, ha ka step Sngi Balang, ki la lap ïa ka metïap jong u samla Wanboklang Kurbah na ka Kshaid Tdem, kaba jngai kumba 20-30 mitar eiei na ka jaka ba la lap ïa ka met jong ka samla Phibankyntiew.
Haba ïadei bad kane, ‘U Nongsaiñ Hima’ uba la leit sha katei ka jaka u la pyntikna ba la lap ïa ka met jong utei u samla na kawei ka kshaid kaba ha ka shnong Krang bad ïa ka met jong u la lap kham shaneng na ka jaka ba lap ïa ka met jong ka samla kynthei.
Ïa ka met jong utei u samla la lap hynne mynstep ha ka por kumba 8 baje, 8.30 eiei da ki nongleit wad shnong ha ka bynta ba shaneng na kawei ka jaka ba kyndong bad kaba jngai kumba 20 ne 30 mitar na ka jaka ba lap ïa ka kynthei.
Namarba ka dei ka kshaid, kumta lehse ka um ka la ñiat noh ïa ka met u samla Wanboklang sha kyndong katba ka met jong ka kynthei pat ka la tuid noh sharum.
Najan ka met jong utei u samla la lap ruh ïa ka pla kaba rong jyrngam.
Ha kajuh ka por, naba katei ka jaka ka long riat, ka la buh jingeh shi kat dei ïa ki pulit SRT ban hiar bad leit sei ïa ka met.
Shuh shuh ïa ka met jong utei u samla la ïoh ban sei ha ka por kumba 12:30 mynsngi hadien ba ki pulit ki la shu jngi bad teh da u tyllai ïa ka met jong u ban tan sha ryngkew.
Ha kawei ka liang, ki bahaïing hasem jong u samla Wanboklang Kurbah ki la pynsngew ba kim kwah ban leh ïa ka ‘Post Mortem’ namar kim don eiei kaba ki suba sniew.
“Ngi sngewnguh ïa U Blei uba la pynshai ïa ngi ba ngi la lap ïa la u khun bad ngin pyndep katkum ka niam ka rukom,” la ong ka kmie utei u samla.
Ka la ïathuh ruh ba yn pyndep noh ïa ka met ba dang sah jong u samla Wanboklang ha ka Sngi Palei namar ki dang ïa ap ïa ka hynmen kaba wan nabar.
Haba pyntikna ba kam treh ban phah leh ïa ka ‘Post Mortem’, ka kmie ka la ong, “Ngim don eiei, te ngin ai leh aïu.”
Kum ban shu kdew hangne, kitei ar ngut ki la jah rngai naduh ka 20 tarik u bnai ba la dep bad la ong ba la ïohi khatduh ïa ki ha ka por kumba 5 baje janmiet ha katei kajuh hi ka sngi.
