Shillong, Risaw 05
U Myntri ka tnat bording ka Jylla u AT Mondal u la ban jur ban khmih biang ïa ka jingkyrshan pisa (subsidy) kaba ju ai T.7.5 klur na ka bynta shi mega watt na ka bynta ki projek pynmih bording kiba rit kiba ju pynmih naduh 1 MW haduh 25 MW, ha kaba u Myntri ka tnat bording ka Sorkar Pdeng, u RK Singh ruh u la mynjur ban peit ïa kane kham kloi.
U Mondal u la pynsngew ïa kane haba ïashimbynta ha ka jingïalang kaba pynlong da ka Ministry of New and Renewable Energy (MNRE) ka Sorkar Pdeng ha New Delhi na ka bynta ban ïatai halor ki jingeh bad ki lad ban kyntiew ïa ka rukom pynmih bording ha ka Thaiñ Shatei Lam Mihngi.
Ha kane ka jingïalang, u Mondal u la batai shaphang ka jingïaid shaphrang ka Jylla haba ïadei bad ka bording nalor ki jingeh kiba ïakynduh bad ki lad ki lynti kiba la shim da ka Sorkar Jylla ban kyntiew ïa ka rukom pynmih bording ilektrik.
Haba kren shaphang ka jingbiang ban pyntreikam ïa ka Pump Storage Project (PSP) u Mondal u la ong ba ki don 4 tylli ki PSP kiba la dep ban jied ban pyntreikam da ka jingkyrshan lang ka NTPC kaba lah ban pynmih bording haduh 3,100 MW hynrei kaba eh ka long nangno yn ïoh pisa na ka bynta kane ka projek.
Kumta u Mondal u la kyrpad ïa u Myntri ka Sorkar Pdeng ban phaikhmat lem ym tang ban ïarap pisa hynrei ban ïarap ruh ïa ki jingshemphang ban pyntreikam ïa kine ki projek.
U la pynsngew shaphang ka jingdonkam ban long shngaiñ ha ka liang ka jingpynmih bording ka Jylla bad ki Jylla ka Thaiñ Shatei Lam Mihngi da kaba pyntreikam ïa ka Chief Minister’s Solar Mission (CM Solar Mission) kaba la pyllait ban pyntreikam da ka Sorkar Meghalaya.
U Mondal u la ïathuh ruh ba ka Sorkar Meghalaya ka la lah ban pyntreikam ïa ka Solar Cold Storage bad Solar Food Processing Unit kiba pynlah kumno ban pyndonkam adkar ïa ka bording ha Jylla.
U Director ka MNREDA u Joram Beda u la pynpaw ka jingsngewkhia bad ki jingeh kiba ïakynduh da ka Meghalaya haba pyntreikam ïa ka Pradhan Mantri Kisan Urja Suraksha evam Utthaan Mahabhiyan (PM KUSUM) bad u la ban jur ïa ka jingdonkam ban kyrshan bad ïasnohkti lang jong ka Sorkar Pdeng khnang ban lah ban ïakhun ïa ki jingeh khamtam ban lah ban pynïaid beit ïa ka jingpyndonkam bording na ka sngi.
U Commissioner and Secretary ka tnat bording u Sanjay Goyal u la pynsngew ïa ka jingtyrwa ban pyndonkam ïa ki solar panel kum ka buit ka ban ïarap ïa ka Meghalaya namar kane ka buit ka lah ban tan ïa ka bording na ka sngi da kaba pyndonkam ïa ki wah bad ki pung ka ban pynlah ban kham pynmih bording.
Ki don ruh ki jingai jingmut na ka Jylla kumno ban kham pynkiew ïa ka jingkyrshan pisa da ka Sorkar Pdeng na ka bynta ka Solar Roof Top scheme, bad ban thaw lad ban pyntreikam da kaba ïadonbynta lang ban pyntreikam ïa ki Solar Parks bad Pump Storage Scheme.
