Shillong, Risaw:
Ka Hynñiewtrep National Youth Front (HNYF) East Khasi Hills District hynne ka sngi ka la pynlong ïa ka jingbteng ban khynra ïa ki kot ki sla jong ki dukan thoh “teem” ha kaba ka seng ka la leit ban hiar sha Laitlyngkot ban lap ïa ka rukom pynïaid ka Hynñiewtrep Indigenous Archery Organizers Institute ïa ka jingsiat “teem” ha Rilum Khasi bad Jaiñtia.
Haba kren sha ki lad pathai khubor, u Bah Orester Mawlong uba dei u dkhot jong ka HNYF Sengkmie u la ong ba ki don bun ki “bookie” kiba pynïaid “teem” ha kaba ki la kamai spah kamai hajar katba ka jingkynshew pisa sha ka sorkar jylla ha ka dur jong ka khajna kam don satia namar bym don ki laisen.
U la ong ba ka jingleit jong ka HNYF sha katei ka jaka siat khnam kaba don ha Laitlyngkot ka dei namar ba ka seng ka kwah ïa ka jingshisha bad ka jingshai ban tip ba kaei kata ka kynhun kaba dei hok ban ïoh ban pynïaid bad ban siat ïa u khnam uba ju pynïaid ha ki jaka kiba pynïaid ha ki jaka thoh “teem”.
U Bah Mawlong u la ïathuh ba ha katei ka jingleit jong ka seng, ka la ïakynduh ïa u nongkitkam jong ka Hynñiewtrep Indigenous Archery Organizers Institute ha kaba u la pyni ïa ki kot bapher bapher kaba katei ka Hynñiewtrep ka don bad ka biang lut ïa ki kot ki sla bad ka sorkar hi ka la ithuh ïa katei ka Hynñiewtrep kaba siat bad pynïaid ïa katei ka “teem” hapoh Laitlyngkot.
Shuh shuh u Bah Mawlong u la ong ba la lap ba ka jingïohlum khajna hapoh ka jingïasiat “teem” ka hiar bha katba ha ki jaka siat khnam kiba pynïaid da ki malik bar jylla kiba long ki “bookie” ki kamai da ki spah bad ki hajar tyngka.
U la ong ba na ka liang ka seng hi ka ban jur ïa ka tnad lum khajna ba kan shim khia kloi noh ha kaba ïadei bad kane ka jaka siat khnam lane ki “teer counter” bad ïa kitei ki kynhun khnang ban pynshisha mano ba dei hok shisha u ban ïoh siat bad pynïaid ïa katei ka jingïasiat khnam.
“Ngi na ka liang ka seng ngin nym shongthait hynrei ngin hiar ruh sha ka madan kaba long ka jaka siat jong u Khasi khnang ba ngin lap ba u Khasi ruh u don shisha ne kumno ïa ki kot ki sla jong ki bym biang. Lada ngi lap ba u Khasi um don, ngi na ka liang ka seng ngin khang beit ha kato ka sngi ba ngi leit ban jurip ïa kato ka jaka”, la ong u Bah Mawlong.
Ka seng ka la maham ruh ba nangne shakhmat lada don kino kino ki Khasi kiba ïada ïa ki mynder ri ha kaba ïadei bad kino kino ki kam, na ka liang ka seng kan ai da kaba tyngeh ïa kito ki jait briew. Ka seng kan nym shong kli-kti bad kan nym sngap, hynrei kan shim da ki sienjam kiba tyngeh bad ka seng kan leh ruh da kaba tyngeh ïa kito ki briew kiba ïada bad die ïa ka ri bad ka jaitbynriew.
“Ngi lap ba ki don ki dukan dkhar bad ynda ngi la ïakren bad ki, ki la wan mih pynban da ki Khasi jong ngi. Ngim sngewtynnad ïa kato ka jingleh jong ki namar ba ki dei ki Khasi jong ngi hi ki wan ban da ïa ki dkhar bad kane ka pynpaw shai ba ka don ka “benami” hangto”, la ong u Bah Mawlong.
U Bah Mawlong u la ong ba ha ka jingleit khynra ïa ki kot ki sla ha kaba ïadei bad ki dukan thoh “teem”, la lap ba bun bah ba kiba bun ki dukan Khasi ki la ïoh ïa kata ka lasen kaba ïadei bad ka Hynñiewtrep hynrei kaei kaba ka seng kam sngewtynnad ka long ba ki don ki Khasi ki wan hangto bad pynshah kyrteng jong ki.
