Jowai, Risaw 05
Da ka mynsiem ka jingkut lad na ka daw ka jingbym ïoh bainong la 6 bnai kynthih, kumba 100 ngut ki nongshet ja shiteng sngi ha ki skul sorkar bapher bapher ka District hapoh ka lama All Jaiñtia Midday Meal Workers Union, Union of Cook Cum Helper PM Poshan ki la pynlong ka jingïakhih kaba shisngi da kaba tied shamoit ha ki pliang.
Kane ka jingïakhih da kaba shong kyllaiñ mungor, ka la long ha phyllaw ka shlem treikam ka District School Education Officer West Jaiñtia Hills District, Jowai ha ka Sngi Palei.
Ha kane kajuh ka sngi ki nongshet ja sngi ki la aipor ruh ïa ka sorkar ba ka dei ban siew noh ïa kane ka bainong jong ki hapoh ka 13 tarik mynta u bnai lane mad ïa ka jingïakhih kaba kham tyngeh.
U Bah Jerry A Suting, President AJMDMWU bad Vice President ka All Meghalaya Union of Cook Cum Helper PM-Poshan haba kren sha ki lad pathai khubor hadien ka jingïakynduh ïa ka Kong AP Syiem kaba dei ka District School Education Officer WJHD, u la ong na ka liang ka DSEO ka la kular ban rah ïa kane ka kam sha ki bor ba halor na ka bynta ban pynlong ka jingïakren.
U la ong ruh ba lada ka sorkar kam pynsngap ïa kane ka jingdawa ka jong ki, kim banse ban shim da kiwei pat ki lynti jong ka jingïakhih kiba kham tyngeh ha ka nongbah Shillong hapoh ka lama jong ka All Meghalaya PM-Poshan ban dawa ïa la ki jong ki hok.
Ha kajuh ka por u la kyntu ruh ïa ka sorkar pdeng ba ka dei ban pynkiew noh ïa ka bainong jong ki nongshet ja sngi namar kumba ka long mynta na ka jingïoh kaba T.2000 shi bnai, tang T.900 la bei na ka sorkar pdeng bad ïa kaba sah T.1100 la siew na ka liang ka sorkar jylla.
