Jowai, Risaw:
Kum shi bynta ban pynshlur bad ai rynsan ïa ki samla ka District ban pynpaw pyrthei ïa ka sap ka phong ka jong ki, ka ophis u District Sports Officer, West Jaiñtia Hills District ka la pynlong ïa ka District Level Youth Exchange Program halor ka phang “Building a Better World Partnering with Youth”.
Ïa kane ka prokram kaba ar sngi lynter ka ban kut lashai ka sngi, la pynlong ha Kiang Nangbah College Auditorium ha ka jingwan ïashim bynta da ki khynnah skul bapher ka District kumjuh ruh ki samla pule na ki kolej ka District ha ka sngi Balang.
Ha kine ki arsngi, ki jait jingïakop ki kynthup naduh ka jingïakop kyntip, tyrko nia, ka jingïakop shad bad rwai tynrai, ka jingïakop tem guitar bad ka jingpyni ïa ka sap ka phong ne talent show.
Ïa ka prokram la sdang da ka ice-breaking session ba la ïalam da ka Kong Phindarilyne Lyndem.
Hashwa kane la ïoh ka jingkren waiphang na u District Sports Officer u Bah Khroobok Passah uba la ong ba ka jingpynlong kum kine ki prokram ka long ban ai rynsan ïa ki samla pule kiba don ha ki skul bad kolej ban ïatai ïa phylliew jingmut ha kiba bun ki liang ki ban wanrah bad tei ïa ka imlang sahlang bad ban sei madan ïa ki sap ki phong jong ki samla.
U la pyntip ba ki samla kiba tbit ha kine ki jingïakop kin ïohlad ban mihkhmat ïa ka District sha ka State Level bad ruh shaduh National bad International Youth Exchange Programme.
