Shillong, Risaw 05
Ki bahaïing jong u Wanboklang Kurbah, 20 snem ka rta, ki la hap ban pyndep ïa ka post mortem sha NEIGRIHMS Hospital, Mawdiang-diang ha ka step jong ka Sngi Palei.
Kane ka jingleh post mortem ka dei hadien ba ki bahaïing hasem ki la kohnguh ïa ka jingbthah ki pulit hadien ba ki magistrate kim shym la soi ïa ka shithi ba kyrpad ki bahaïing ban pyllait ïa ka post mortem ha ka Sngi Balang hadien ba la lap ïa ka metïap.
Kumta ha ka step jong ka Sngi Palei kaba dei ka 5 tarik Risaw, ki bahaïing ki la rah ïa ka met jong u Wanboklang na ïing sah na Traw bad poi haduh 7:30 mynstep sha NEIGRIHMS ban pyndep ïa ka post mortem.
Na ka liang ki doktor ki la sdang ban leh ïa ka post mortem ha ka por 11:00 baje mynstep namar ki hap lied ïa ka synduk kaba la dep thep da ki bahaïing.
Wat la na ka liang ki bahaïing hasem ki la dep shim ïa ka rai ha ka step jong ka 4 tarik Risaw mar shu lap ïa ka metïap jong u Wanboklang Kurbah uba la jah na ïing mynta la artaïew eiei ban nym leh post mortem hynrei ban rah beit sha ïing namar kim shym la suba sniew halor kane ka jingkhlad u khun jong ki.
Haba ïa ka met jong u Wanboklang la dep sei na ka jaka ba lap ba u la khlad la rah beit-beit sha ïing bad la buh ruh ha ka synduk metïap khlem da rah sha Civil Hospital kumba la rah ïa ka met jong ka Phibankyntiew Sun namar ka jingthmu ka long beit ban nym leh post mortem hynrei ban tep beit sha u lum jingtep.
Haba ki bahaïing kim kwah ban leh post mortem ki hap ban ïoh ïa ka jingbit na ki magistrate, kumta ka Meiduh jong u Wanboklang Kurbah ka Kong Eusebia Kurbah ka la mih na la ïing ha ka por 7:00 duna mynstep jong ka 4 tarik Risaw ban leit sha ka Deputy Commissioner ka East Khasi Hills District ban rah artad ïa ka shithi pan jingbit ban pyllait ïa ka post mortem.
Haba ka Kong Eusebia ka la poi sha ka shlem treikam Deputy Commissioner kam shym la ïoh ïa ka jingbit ban pyllait ïa ka post mortem. Kumta ka la leit kylli jingmut na Civil Hospital Shillong, hynrei hadien ba la ïakren bad u pulit ba dei peit ïa ka Mawngap Police Station la phah noh ban post mortem ïa u Wanboklang sha NEIGRIHMS namar ha Civil Hospital la leh ïa ka kynthei.
Haba ïakren bad ki nongthoh khubor katba dang ap ïa ka post mortem ïa u Wanboklang ha NEIGRIHMS, ka Kong Eusebia Kurbah kaba dei ka Meiduh jong u Wanboklang, ka la ïathuh ba ki bahaïing hasem ki la pdiang ban post mortem hadien ba ki bor jong ka aiñ ki la bthah ban post mortem.
Hadien ka post mortem, wat la hapdeng ka jinghap u slap, ki bahaïing hasem ki la ïoh ban pyndep ïa ka jinglehniam kaba khatduh ha shwa ban tep ïa ka met kaba sah jong u Wanboklang Kurbah ha u lum jingtep ka Balang Katholik Marbisu, East Khasi Hills District.
Kane ka jinglehniam khatduh ïa u Wanboklang ka dei hadien ba la dep leh post mortem na NEIGRIHMS Shillong kaba la pyndep ha ka por 12:30 shiteng sngi bad la poi ha u lum jingtep ka Marbisu ha ka por 1 baje 42 minit bad la ïoh ban pyndep ïa ka jinglehniam khatduh haduh ka por 2 baje nohphai sngi eiei.
