Nongstoiñ, Risaw 05
Ka Federation of Khasi Jaiñtia & Garo People (FKJGP) Rambrai Circle ka la dawa na ka tnat PWD, Nongstoiñ Division ba kan bthah ïa ki kontraktor ba ki dei ban sdang noh ïa ka jingpyntrei ïa ka surok na lad Mawrang-Ïew Rambrai ter ter shaduh Rambrai bah kaba jrong 2.5 kilometer.
Ki nongïalam ka FKJGP ki la ong ba hadien ka jingujor jong ki paidbah halor ka jingsniew palat pud jong katei ka surok, ka FKJGP lyngba ka jingwad jingtip da ka RTI la lap ba ka mang pisa lane ka sanction na ka bynta katei ka surok ka long T.2.24 lak tam (ar klur arphew saw lak khyndai phew sanhajar arspah tyngka) bad la dep ruh ban ai ïa ka work order sha ki 10 ngut ki kontraktor naduh ka 05.04.2023.
Shuh shuh katkum ka RTI ba la ïoh, la ïohi ba dei ban pyndep hapoh 12 bnai kata ha shwa jong u bnai Ïaïong 2024. Hynrei kumba ka long haduh mynta ym pat i don dak satia jong ka jingpyntrei ïa katei ka surok.
Na ka liang ka FKJGP halor kane ka surok, ha ka Sngi Palei ka la leit ban ïakynduh bad aiti ruh ïa ka jingthoh sha u Executive Engineer ka tnat PWD Nongstoiñ Division ban dawa ba un tuklar bad phah trei noh kham kloi ïa ki kontraktor kiba ïoh ïa ka kam, namar katei ka surok ka la jot shaba palat.
La ïathuh ruh ba ha katei ka jingleit ïakynduh jong ka FKJGP, na ka liang u EE u la kular ban shim khia ïa katei ka kam.
