Shillong, Risaw 05
U Symbud Myntri Rangbah ka jylla, Bah Sniawbhalang Dhar uba bat ïa ka tnat Pynroi Sor u la pyntip ba ka jingpyntrei ïa ka projek ‘Smart City’ hapoh ka jylla ka la ïaid shaid-shaid shakhmat.
Haba kren bad ki lad pathai khubor ha ka sngi Palei, u Symbud Myntri Rangbah u la ong, ka projek ‘Smart City’ kaba kynthup ïa 17 tylli ki projek ka la ïaid shaid-shaid bha bad ha kaba ïadei bad ka Integrated Command and Control Centre (ICCC) dei ban pyndep noh hapoh jong u Lber 2024.
U Bah Sniawbhalang u la ong, “Ïa kiwei pat ki projek ngi dei ban lah pyndep noh hapoh u bnai Jylliew 2024 bad mynta hi ngi dang pyrshang katba lah ban leh ïa kane. Ki katto-katne ki projek lyngba ka Smart City ki kynthup ïa ka ïew Laitumkhrah, ïew Polo, ki jaka ïeng kali (Parking Lot) kiba heh, ki Smart Road bad kiwei kiwei bad baroh ki long 17 tylli ki projek.”
Haba kylli halor ka jingjur ka dheng kali ha nongbah Shillong, u Bah Sniawbhalang u la ong, ïa kane ka jingeh na ka jingdheng kali yn sa lah ban weng kumba 30 haduh 40 persen tat ynda la rah ne pynkynriah noh ïa ka Secretariat sha New Shillong Township bad la khmih lynti ba ïa kane yn sa lah ban pyndep ha ki 2 ne 3 snem ban wan.
“Ynda ngi la pynkynriah noh ïa ka Main Secretariat sha New Shillong Township, ka ban shim por sa kumba 2-3 snem, te ki ophis sorkar ruh kin sa kynriah lang bad kane kan sa ïarap shibun ban pynduna ïa ka jingdheng kali,” la ong u Bah Sniawbhalang.
Nalor kane u la ong ruh ba ynda la dep ban tei lut ïa ki jaka pynïeng kali ne ki Parking Lot, la khmih lynti ba kin pynduna khyndiat ïa ka jingdheng kali khamtam haba bun ki paidbah ki ju pynïeng ïa ki kali ha kat ba lap ba shem ha ki bynta jong ki surok.
Ha kaba ïadei bad ka jingpyntreikam da ka ‘Odd bad Even’ ïa ka jingpynïaid ïa ki kali, u Symbud Myntri Rangbah u la ong, “Ka la long ka jingeh, ngi hap ban sngap ïa ka sur bad jingpynsngew jong ki paidbah, hynrei ngi dang ïaid ha katei ka bynta bad dang shen ngi la shong jingïalang bad ka Deputy Commissioner ruh.”
