Shillong, Risaw 05
Ki samla pule na ka jylla kiba don ha Sikkim ki la phah jingtip sha u Myntri Rangbah, Conrad K. Sangma, ba ki kwah ban wanphai noh sha la ïing la sem namar ka jinglong jingman ka jaka hadien ka jingther jong u slap bad ka jingshlei um kaba la sdang ha ka Sngi Balang.
Haba pyntip ïa kane lyngba ka rynsan ‘X’, u Conrad u la ong, “Ki samla pule na Meghalaya kiba don ha Sikkim ki la ïakren bad nga bad ki la pan jingïarap ban wanphai noh sha la ïing. Ka sorkar Meghalaya ka la ïakren bad kine ki samla bad ban ai jingïarap ïa ki.”
Lah ban kdew ba ka jingïap briew na ka jingshlei um ha Sikkim ka la kiew sha ka 14 ngut ha ka Sngi Palei katba 102 ngut ki briew, kynthup ïa 22 ngut ki shipai, ki dang jah rngai ha North Sikkim.
Ka jingshlei um ka la ktah jur ïa ka Chungthang Dam kaba dei ka shlem pynmih bording kaba heh tam ha Sikkim, ïa ka Teesta Stage-3, kaba don ha ka wah Teesta kaba ïaid lyngba ka Sikkim, West Bengal ha shwa ban rung sha Bangladesh.
Ka sorkar Sikkim ka la pynbna ba ki skul bad ki kolej kin khang haduh ka 15 tarik Risaw. Ki khubor ki ïathuh ruh ba palat 3,000 ngut ki nongjngohkai pyrthei ki la sahkut ha ki bynta bapher bapher jong katei jylla.
