Shillong, Risaw 05
Ïa ka Dur-im (Film) Wad Ïa ka Malade (Search of Self) ba la pynmih da ka Na-Me Productions la pyllait paidbah ha ka 4 tarik Risaw ha Mission Compound Durbar Hall da u Rangbah Shnong ka Mission Durbar, u Bah Jeffrey Basan, ha ryngkat ka jingdon lang jong u Prasanjit Mishra kum u Producer & Director BLACK SCREEN STUDIO.INC uba dei nongpynmih Film Hindi na Mumbai.
La sdang ïa ka jingïalang da ka jingduwai na i Secretary Shnong i Bah Don Kupar War, la don ryngkat ruh u Rangbah Shnong ka Mawbah, u Bah Arestone Thabah, ki tyngshop ki puron bad kiwei de kiba la shah khot sngewbha. Ka ‘Wad Ïa ka Malade’ ka dei shaphang ka jingïaid lynti jong man la u/ka briew ha ka jingim ba shimet jong ki bad ka ai mynsiem ba ha kano kano ka khyllipmat ngim dei ban duh jingkyrmen namar U Blei U don la ka plan na ka bynta iwei-pa-iwei.
Kane ka Dur-im ka don ïa ka khana kaba sngewtynnad ha ryngkat ki tyngshop ki puron kiba tbit. La ïaroh lut da baroh kiba la wan peit ïa ka sap ba ki tyngshop ki puron ki la pynpaw. Ïa kane ka dur-im la direct bad ak da i Alfidarie Kharsyntiew kum ka Puron Pdeng, ka puron jong ka “Ngan Wad Ha Ban Da Shem”, “Ka Snam Ka Ud”, “Wad Shyieng Krung” bad kiwei kiwei. Ka long ka dur-im kaba itynnad bad ai mynsiem ïa kiwei ki para samla ba kin ïaid bad poi sha ka thong ban ïoh ïa ka jingangnud ba bha ha ka jingim. Ha kane ka sngi la ot ruh ïa u Cake kum ka jingplie artad ïa ka Na-Me Productions bad ka jingbam ja-miet ynda la wai.
Ïa kane ka dur-im yn pyni paidbah naduh ka 9 tarik Risaw, 2023 shaneng ha ka Hall Dorbar Shnong Mission. Ka por ban pyni ka long 12 baje, 2 baje, 5 baje bad 8 baje. Ka dor jong ka tiket ka long T. 200 marwei.
