Nongpoh, Risaw 05
Ki pulit ka Ri Bhoi District ha ka Sngi Palei ki la ïoh ban kem noh ïa lai ngut ki nongkhaïi drok napoh kawei ka Super Bus na ka thaiñ Nongpoh bad na kine ki briew la ïoh ruh ban kurup ïa u drok.
Katkum ka khubor ba la ïoh lum la ong ba ki pulit hadien ka jingïoh jingtip ba ka don kawei ka bos kaba don ïa u number AS24-AC-1152 kaba dang wan na Silchar ban leit sha Guwahati ha kaba la suba jur ba ka kit drok.
Halor kane, ki pulit ki la pynlong ka jingpynap shrip ïa kane ka bos ha Nongpoh bad ki la ïoh ban bat noh ïa ka. Ïa kine ki briew bad ïa u drok la ïoh ban kurup ha ka jingtalasi ïa kane ka bos ha thaiñ Nongpoh.
Ha kane ka jingtalasi ïa kane ka bos, ki pulit ki la ïoh ban kurup haduh 30 tylli ki synduk sabon kiba la thep bad song bha ïa u drok heroin uba khia haduh 921 gram. Nalor kane, ki la ïoh kurup ruh 3 tylli ki mobile phone bad kumjuh ïa kane ka bos.
Nalor kata, ki pulit ki la kem noh ïa lai ngut ki briew kynthup ruh ïa u nongñiah bad u nongbud jong ka bos. Ïa kine ki briew la pynrung case ha thanat Nongpoh hapoh ki kyndon jong ka NDPS Act.
