Jowai, Risaw 05
Ka synjuk ki trai trok kiba don hapoh ka lama jong ka Jaiñtia Hills Truck Owner Association (JHTOA) ka la sdang ïa ka jingïakhih ba khlem buh por hadien ka jingshah thok shah shukor kaba man ka por ha ka synjuk ki karkhana pynmih dewbilat kiba don ha ka thaiñ East Jaiñtia Hills District.
Kane ka jingïakhih ka la sdang ha ka Sngi Palei ha Takhniang, Tuber hajan ka shlem treikam jong ka seng ha kaba ki dkhot ka JHTOA ki la bat bad pynphai noh ïa ki 25 tylli ki trok kiba kit ïa ki mar ba pynmih na ki karkhana pynmih dewbilat.
Haba ïakren bad u President ka JHTOA u Bah Biangshwa Shylla u la ong, ki karkhana pynmih dewbilat kiba don ha ka thaiñ Lumshnong, Wahïajer bad Thangskai na ka por sha ka por ki thok palat ha kaba ïadei bad ka kit ka bah.
U la ong haba ka JHTOA ka ïakren bad ki, ka ktien ka khana jong ki ka long kaba beit bha hynrei ha ka jingpyntreikam kawei ruh ym long kam, bad kane ka jingleh jong kine ki karkhana ka pynmong bad pynsngewsih shi kat dei eh namar kim kheiñ snep ïa ki trai jylla kiba kamai jakpoh na ki trok.
U la ban ba na ka por sha ka por ka seng ka ju pynlong ïa ki jingïakhih ban pyrshah ïa ki karkhana bad ha kine ki ar snem ba la dep ka sorkar Jylla ka la pynmih ïa kawei ka ‘notification’ kaba ka seng ka dawa ha kaba ïadei bad ka dor kit dor bah.
U la ong hadien katei ka byrta (notification), ka la don ka jingïalang pynbeit hapdeng ki karkhana, ki trai trok bad ki bor District jong ka East Jaiñtia Hills bad ha kata ka jingïalang la mynjur ban ai ban kit ban bah ki trok hapoh ka JHTOA kumba 60 tylli ha ka shisngi, hynrei ki ïoh tang kumba 15 tylli ki trok ha ka shi sngi.
Kumta u la kyntu ïa ka sorkar MDA 2 ba kan shim khia lang ïa kane ka kam namar kumba long mynta kiba don trok ki im ha ka khim khait wat tang ban siew ïa ka ram sha ki bank kim lah shuh.
