Shillong, Risaw 05
Ka Meghalaya Editors’ and Publishers’ Associa-tion (MEPA) kaba dei ka synjuk ba ha khlieh duh jong ki lad pathai khubor ha Meghalaya, ka la ïoh pdiang ïa ki jingujor na ki nongpathai khubor ha ki distrik bapher bapher jong ka jylla ïa ka jingdon jong ki ‘YouTuber’ shimet (Private YouTuber) kiba leit lum khubor kylleng kylleng, kiba leit ha ki jingïalang bapher bapher jong ka sorkar, bad ruh kiba leit ban don ha ki Press Conference, Press Briefing ha ki distrik.
Nalorkata, ka MEPA la ïoh ruh ki jingujor ba ki don ki YouTuber kiba tah ïa ki jingthoh ‘Press’ ha ki kali jong ki.
Ka MEPA ha ka jingïalang kaba la long ha Shillong ha ka Sngi Palei ka la rai ban pynshai sha baroh ki paidbah ba ki lad pathai khubor ba la aibor ban trei ki dei kiba la pynrung kyrteng (Register) ha ka shlem treikam u Registrar of Newspapers of India (RNI) bad ruh kiba la ithuh (Empanelled) da ka Directorate of Information and Public Relations (DIPR) jong ka Sorkar Meghalaya.
Ha katei ka jingïalang la ong ruh ba ki nongpathai khubor ne nonglum khubor ki hap ban don ïa ka ‘Identity Card’ ba la ai da ka kotkhubor, TV Channel lane Digital Channel ba ki trei lane ka Accreditation Card ba la ai da ka DIPR.
Kumta, khnang ban lait na kino kino ki jingshim kabu na ki riewshimet bad ban kiar na ki jingkulmar jingmut, ka MEPA kan sa thoh sha ka DIPR halor kane ka kam khnang ba ki paidbah kin ym shah ïalam bakla ha ki briew kiba kam ne leh ïalade kum ki nonglum khubor lane nongpathai khubor.
Ha kajuh ka por, na ka liang ka MEPA ha ka jingïalang ba la long mynta ka sngi ka la rai ban ai don bynta lang bad ki kynhun jong ki lad pathai khubor bapher bapher ha Ri India ban thoh sha u Chief Justice ka Ri India bad kyntu ïa u ban tuklar lem halor ki jingpyrshang ban khñiot ïa ka hok jong ki nongthoh khubor (Press Freedom) kumba ka la jia ha ki khyndiat sngi ba la dep ïa katto katne ki nongthoh khubor ha Delhi.
