Shillong, Risaw 05
Ka Meiduh trai jong u Wanboklang Kurbah, ka Kong Eusebia Kurbah, ka la ïathuh ba u hynmen ba kha synrap u Khrawbok-lang Kurbah u ju pynpaw ba u don jingkyrmen ba u para ba ki ïa ieid un wanphai ïing beit hadien ba u la jah na ïing.
Haba ïakren bad ki nongthoh khubor ha NEIGRIHMS, ka Kong Eusebia ka la ïathuh ba la kha shwa ïa u Khrawboklang bad hadien san minit la kha sa ïa u Wanboklang, hynrei kim da ïasyrïem than ka durkhmat.
Ka la ïathuh ba u Wanboklang u dang dap 20 snem ka rta ha ka 16 tarik Nailur, 2023, hynrei u la jah noh na ïing ha ka 20 tarik Nailur, 2023.
Ka la ïathuh biang ba une u khun synrap uba heh ki don ki por ba u don ka jingsngewtlot bad khia ka mynsiem haba u para u jah na ïing.
“Ngi la don jingkyrmen ba u Wanboklang un wanphai ïing namar u hynmen ba kha synrap u ju pynpaw ba un wanphai ïing tangba ym tip ha kano ka por ne ka sngi,” ka la ong.
Ka la ong biang ba ym shym poi pyrkhat ba u Wanboklang un khlad na kane ka pyrthei haba u la jah na ïing.
