Shillong, Risaw 05
Ka Khasi Authors’ Society (KAS) ha ka jingïakynduh ba dang shen ha nongbah Delhi, ka la shim ïa saw tylli ki rai ba kynthup ïa ka jingdawa na ka Sorkar Pdeng ba kan wanrah noh da ka aiñ rew ne ka ‘Official Bill’ hapoh ka ïingdorbar Parliament ha kaban pynrung ïa ka ktien Khasi ha ka khyrnit ba phra jong ka Riti Synshar ka Ri.
Nalor kane, ka KAS ka la ai por ruh ïa ka Sorkar Pdeng ba kan leh eiei ha shwa ban don biang ka dorbar Parliament, bad lada ka Sorkar kam lah ban ai ïa ka jubab na ka liang ka KAS kan pyrkhat biang da kiwei ki lad jingïakhih.
Lah ban pynkynmaw ba na ka liang ka KAS ka la pynlong ïa ka National Seminar halor ka ‘Ktien Khasi, ka thoh ka tar bad ka kolshor’ ha Delhi lem bad ka jingïakhih ba jai-jai ha Jantar Mantar kaba long ha ka 29 bad 30 tarik Nailur bad ha kine ki jingïalang ba la shim ïa ki saw tylli ki rai.
Haba kren sha ki lad pathai khubor ha ka Sngi Palei, u President ka KAS u Dr. DRL Nonglait u la ong, “Ngi la rai ban kyrpad ïa ka Sorkar Pdeng lyngba ka Ministry of Home Affairs ban shim ïa ka sienjam ban wanrah da ka Official Bill ha ka dorbar ban wan jong ka Parliament namar kane kan dei ka lynti ha kaban pynrung ïa ka ktien Khasi ha ka khyrnit kaba phra jong ka Riti Synshar ka Ri India. Ka Sorkar kan hap ban pynkylla ïa ka khyrnit ba phra ban pynrung ïa kino kino ki ktien ba kin long noh shibynta jong ki ktien ha ka khyrnit ba phra”.
Kawei pat ka rai ba ka KAS ka la shim ka long ba ka ophis u Myntri ka tnat Kam Pohïing ka Ri, ka dei ban ai jingshai halor ki dorkhas kiba ka Society ka la dep ban aiti ha u Amit Shah ha ka por ba u wan sha Shillong ha u bnai Kyllalyngkot jong u snem 2021, bad kawei ka dorkhas ba pynkynmaw biang ïa u Amit Shah ha u Naitung 2021, namar haduh mynta ka Sorkar Pdeng kam pat shym la ai jubab eiei.
U Dr. DRL Nonglait u la pyntip ba ka KAS ka la ïakynduh ruh ïa u Myntri ka tnat Kam Pohïing barim u Rajnath Singh ha u Kyllalyngkot 2019 bad ïa u Myntri kam pohïing ba mynta ha ka 24 tarik Naitung, 2021 ha Shillong.
“Hynrei ngi dang ïoh ïa ka jubab na ka MHA tang ha u Lber 2019 bad hadien kane ngim shym la ïoh jingtip shuh, ym don satia ka jingaiktien na ka Ministry sha ka KAS lane wat sha ka Sorkar Jylla. Ta ka daw ngi la shim ïa ka rai ban pan ïa ka jubab na ka Sorkar Pdeng,” ong u Dr Nonglait.
Nalor kane ka KAS ka la shim rai ruh ban pynbiang ïa ka thup jingtip (documentation) ryngkat ki jingpynshisha ba ka ktien Khasi ka la dei por ban ïoh jingithuh noh ha ka Khyrnit kaba Phra bad ka rai ba khatduh ba ka KAS ka la shim ka long ban pan ïa ka jubab jong ka Sorkar ha shwa ka dorbar Parliament bad lada ym lah ban pynurlong ka la maham ban pynlong da kiwei pat ki lad jingïakhih ban pynïoh ïa ki jingdawa.
Shuh shuh u Dr. Nonglait u la ïathuh ba ha ka por ba ki don ha Delhi ki la leit ban aiti ïa ki dorkhas bathymmai sha ka ophis u Amit Shah, sha ka ophis u Myntri Rangbahduh, u Narendra Modi bad kumjuh sha ka ophis jong ka President ka ri India, ka Draupadi Murmu.
