Shillong, Risaw 05
Ki nongïalam ka Khasi Author Society (KAS) ki la pyntip ba na ka liang jong ka society kam shym la khot tang ïa ka UDP ne NPP hynrei ka la khot bad wer ïa baroh ki seng saiñ pyrthei sha ki prokram ba la pynlong ha nongbah Delhi.
“Ngim shym la khot satia tang ïa ka UDP ne NPP hynrei kum ka kynhun, ngi la khot bad wer ïa baroh ki seng saiñ pyrthei ban ïadon bynta bad kyrshan lem ïa ka jingïakhih ban pynrung ïa ka ktien Khasi ha ka Khyrnit kaba Phra jong ka riti synshar ka Ri,” la ong u Dr. DRL Nonglait haba kren sha ki lad pathai khubor ha ka Sngi Palei.
“Hooid, ka jingkhot sngewbha kaba kyrpang ba ka KAS ka la khot, ka long ïa u MP ka Lok Sabha u Bah Vincent H Pala, ïa u MP ka Rajya Sabha u Dr. W Kharlukhi, ïa u Myntri ka tnat Arts and Culture ka jylla u Bah Paul Lyngdoh, ïa u Bah A.L Hek, ïa u CEM ka KHADC kiba ïadon bynta bad kane ka kam bad ruh bad ka KAS,” la ong u Dr Nonglait.
U la ong ruh ba na ka liang jong ka KAS ka ai khublei ïa baroh kiba don bynta ban ai jingkyrshan ïa ka jingïakhih jong ka Society ha Delhi, naduh ki nongmihkhmat paidbah ki nongïalam seng saiñ pyrthei, ki seng bapher bapher bad kumjuh ki ‘riew shemphang kiba don sha kiwei pat ki skulbah ka ri India kiba la don bynta lang bad ka KAS ha ka seminar kaba la pynlong ha nongbah Delhi.
Ha kawei pat ka liang haba kylli, u Dr. DRL Nonglait u la ong ba ka shong ha ka Sorkar Pdeng ban peit, lah ne em ban pynrung ar tylli ki jait ktien na kane ka Jylla khamtam ba ka Meghalaya ka dei ka Jylla kaba rit, bad kumjuh namar ba kiwei ki Jylla ruh ki buh ïa kum kine ki jingdawa.
U la ong ba ka jingdawa jong ka KAS naduh kaba sdang ka long ban ithuh ïa ka ktien Khasi ha ka Khyrnit kaba Phra, hynrei hadien ba ka Sorkar ka la shim ïa kane ka mat ka la mynjur lang ïa ka rai (resolution) hapoh ka ïingdorbar thawaiñ ban ithuh lang ruh ïa ka ktien Garo. Hynrei u la ong ba ka jingkwah jong ka KAS ka long ba ka Sorkar India lane ka Sorkar Jylla kim dei ban ong ba hap ïoh baroh ar lane ban ong ynnai lada ïoh jingithuh tang kawei ka jait ktien.
Ha kawei ka liang u Dr. Nonglait ban ong ba ka jingsuki ban ïoh jingithuh ïa ka ktien Khasi ka dei ka jingbakla lynti ha kaba ïadei ban buh ïa kane ka jingdawa hapoh ka Home Ministry ha ki por ba la dep, bad bynrap ba ha kito ki por la dawa tang ki MP khlem ka jingïatreilang lane ka jingthoh kaba shai na ka Sorkar Jylla kaba pynlong ïa ka KAS ban dawa na ka Sorkar ban mynjur ïa kawei ka rai (resolution).
