Tura, Risaw 06
Ki nongtrei ka Garo Hills Autonomous District Council (GHADC) hapoh ka shatri jong ka Non Gazetted Employees Association (NGEA) ki la rai ban ïaid shakhmat bad ka jingïakhih halor ka jingbym siew ïa ka tulop kaba 31 bnai jong ki nongtrei.
Katei ka rai ka la wan hadien jong ka jingbym lah u CEM, u Albinush Marak ban pynurlong ïa ki kular ba la khlei ha ka 18 tarik u Nailur – uba la wan mih hi da lade sha ka jingïalang ïakhih jong ki nongtrei ha ryngkat ka jingkular ban siew dep ïa ka tulop kaba 2 bnai hapoh katei kajuh ka taïew.
Katei ka jingkular katkum ki dkhot ka NGEA ka la pulom, ha kawei ka liang, kaba pynbor ïa ki nongtrei ban ïaid shakhmat bad ka jingïakhih.
“Ngin sdang da ka jingshong kyllaiñ mungor kaba lai sngi naduh ka 10 tarik Risaw, bad yn bud sa kiwei pat ki jingïakhih kiba ngin sa shim rai. Ha kane ka sien, ngin ym shongthait katba ki jingkular jong ngi kim pat urlong. Ka jingïakhih jong ngi
kan nang jur ha ki sngi ki ban wan,” ong u President ka NGEA, u Brithen Sangma.
U Sangma lem bad kiwei-kiwei ki dkhot ka NGEA ki la ther tyngeh halor ka jinglong-jingman hapoh GHADC.
“Ki jingeh ba ngi ïakynduh ki bym lah ban batai. Ngim lah bsa ïa ki khun ki kti khlem pisa. Ki khun jong ngi kim lah ban leit pule lada ngim lah ban siew dep ïa ka bai skul jong ki. Da ka tulop kaba ngi dei ban ïoh, lehse la lah ban pynurlong tang ïa kine, hynrei ha kaba kut, ym don mano-mano kiba pyrkhat na bynta jong ngi,” ong ka Secretary, Jill Momin.
Kaei kaba sngewlyngngoh haba ïadei bad kane ka long ba watla kiba bun ki nongtrei kim pat ïoh tulop, kumba 20% ki la ïoh pdiang ïa ka tulop. Wat la ym shym la don ba kren eiei halor katei ka jingleh shiliang, kiba bun ki sngew ba kane ka lah ban long ka jingthmu ban pynïaphiah ïa ki nongtrei.
Haba kylli, ki dkhot ka NGEA ki la pynpaw ba kim tip satia ba balei ym shym la siew dep ïa ka tulop naba ka khajna na ka GHADC ka pynbiang ïa kumba 70% ka pisa kaba donkam ban siew ïa ka tulop.
Ki nongtrei ki dang ïoh ïa ka tulop kaba tang 2 bnai ha kine ki 10 bnai ba la dep mynta u snem.
“Ngi kyrpad sha ki bor ba dei khmih ban sngewthuh ïa ka jingeh bad ban siew ïa ka tulop jong ngi. Ym tang ba ngim ïoh jingsiew, hynrei ym shym la kyntiew tulop ïa ngi la bun-bun snem mynta. La siew tulop sha ngi katkum ka ‘4th Pay Commission’ katba ki nongtrei Sorkar ki muja ha ryngkat ki jingmyntoi kiba heh,” bynrap sa uwei u dkhot, u Sengman Momin.
“Ngi dang pynkhreh kaei kaba ngin leh hadien kane lada ym lah ban pynurlong ïa ka jingdawa jong ngi. Ngim don lad da kumwei pat hynrei ban bteng ïa ka jingïakhun na bynta ka tulop jong ngi lyngba ki jingïakhih lym kumta kan pynduh ïa ka jingdonkam jong ki longïing jong ngi. Sa katno ngin neh kumne khlem ka bam ha ka miej jong ngi? Ki pla ha ki jaka kynshew ki la thylli,” ong u Brithen.
