Shillong, Risaw:
U Symbud Myntri Rangbah ka Jylla, Bah Sniawbhalang Dhar ha ka Sngi Palei, u la pyntip ba hadien jong ka shuti Puja ne ka lehniam ki riewngeit Hindu, kan sa don ka jingïakren bad ka Harijan Panchayat Committee (HPC).
“Ïa mynta lehse na ka liang jong ki ophisar ki dang bunkam bad ki prokram bapher bapher, hynrei tang shu kut ka shuti Puja ngin ïaleh ban pynbeit kloi noh ïa kane ka kam. Ka dei da ka jingïakren bad ngi khmih lynti ba kaei kaban mih kan long kaba bha,” la ong u Bah Dhar haba kren bad ki lad pathai khubor.
Ha kajuh ka por u la kdew ba wat ka ïingbishar ka la hukum ïa ka sorkar jylla ba ka dei ban pyndep ïa katei ka kam hapoh une u snem. Kumta kin ïaleh ban pynbeit noh ïa kane ka kam ha shwa ban kut u 2023.
Shuh shuh u la pyntip ba kam shym la don kano-kano ka jingdawa kaba thymmai, hynrei ka HPC ka la kyrpad pat ban don ka jingpynkylla hangne-hangtai ïa ka jingdawa kaba ki la dep ban dawa kham mynshwa.
