Shillong, Risaw 06
Ha kawei ka jingjia kaba sngew shyrkhei bad pynpar ñiangkhriat la ong uwei u rangbah uba la tip kyrteng kum u Khielangstar Nongbri, 30 snem ka rta uba shong ba sah ha Wahnongkseh kaba hapoh ka shnong Sohïong u la shah dung da ki tiar ba nep na ki bynta jong ka kpoh ha ka step phyrngab jong ka 6 tarik u mynta u bnai (Risaw) ha la u para kur haduh ban da mih snier shabar.
Na ka liang ki bahaïing bahasem jong utei rangbah hadien ba ki la lap ïa kane ka jingjia ki la pynkit noh ïa u Khielangstar sha Sohïong CHC hynrei namar ka jingbym biang ki tiar jingsumar, ki bor sumar jong ka Sohïong CHC ki la phah pynkit noh ïa utei u rangbah mar mar sha Civil Hospital Shillong ha ka por 7 baje mynstep.
Haba ïoh ban ïakren bad ka Kong Mirdaris Nongbri kaba dei ka hynmen trai jong u Khielangstar Nongbri ka la ïathuh ba katei ka jingjia ka la jia ha ka por 3-4 baje mynstep ha ka ïingsah jong u Bah Khielangstar ha kaba utei u briew u la rung jubor ha ka ïing jong u Bah Khielangstar ha ka por ba u dang ïohthiah.
Katei ka hynmen jong u Bah Khielangstar ka la ïathuh ruh ba utei u briew uba la dung ïa u para jong ka u dei ba la tip kyrteng kum u Arbor Nongbri bad ka la ong ba kam tip satia ïa ka daw kaba pynlong ïa katei ka jingjia ba kan jia kumtei. Nalor kata, katei ka hynmen ka la ïathuh ruh ba u Khielang u dei uba sah marwei bad hadien ka jingmynsaw u la leit ban mareh sha ka ïingsah jong ka hynmen ban ïathuh ïa kaei kaba la jia ïa u.
“Ngim tip ïa ka daw ruh hynrei uta u briew u la shu wan ban rung jubor hapoh ïing bad u la wan ban dung ha jingthiah”, la ong katei ka hynmen.
Shuh shuh katei ka hynmen ka la ïathuh ba u Arbor u dei uba ithuh ithaw bha ha dong ha shnong bad kitei arngut ki ïadei shiparalok bha.
Kumta haba ïadei bad kane ka jingjia na ka liang ki bahaïing u Bah Khielangstar ki la ïathuh ba kim pat ujor eiei sha ki bor pulit.
Na ka liang ka Hynñiewtrep Youth Council (HYC) Sohïong Circle ka la pynrem jur ïa kane ka jingjia bad ka la kyntu ruh ïa ki bor ka aiñ ba kin shimkhia halor kane ka jingjia khnang ba kum kine ki jingjia kim dei shuh ban dang ïai jia nangne shakhmat. Nalor kane, ka seng ka la pynpaw ka jingsngewkhia kaba khraw ha kaba ïadei bad ka jingkheiñ sting jong ka Shillong Civil Hospital ban sumar ïa utei rangbah namar ba haduh ka por 2:30 nohphai sngi ruh, ki doktor ka Civil Hospital kim pat wan ban ai kano-kano ka jingsumar ïa u Bah Khielangstar. “Ka jingshitom ka la long kaba shyrkhei bha ha kaba ka snier ka la mih shibun bha shabar bad katkum ka jingkylli jong ngi, ki bahaïing ki la ïathuh ba ki la poi naduh ka por 7 baje mynstep hapoh Civil Hospital hynrei haduh mynta, na ka liang ki nongsumar ka Civil Hospital kim pat shym la lah ban thep ïa ka snier shapoh”, la ong ka HYC.
