Shillong, Risaw 06
Ka Hynñiewtrep Youth Council (HYC) Sengkmie hapoh ka jingïalam u Bah Robertjune Kharjahrin kum President bad Bah Roykupar Synrem kum General Secretary ha ka jingïadon ryngkat ka HYC Jaiñtia Hill ha ka sngi Thohdieng ka la leit sha Lapangap ban ai khublei ïa ki nongïalam shnong bad kumjuh paidbah ka shnong Lapangap.
U Bah Robertjune u la ong ba ka seng ka ai khublei namar ki nongshong shnong ki la ïeng rangbah ban ïakhun pyrshah ïa ki Assam & Karbi ban ïada ïa u pud u sam.
U la ai khublei ba ka jingïaleh jong ki ka la ai mynsiem ïa ka jaidbynriew Hynñiewtrep hi baroh kawei. Kumta u la ong ba ka seng kan don ryngkat bad ki para ha ri ban ïeng ïada ïa la u pud u sam ka Bri u Hynñiewtrep.
“Ngim dei ban klet ha ki 1970 ki don ki rangbah kiba la ïeng ban ïada ïa u pud u sam kiba la shah kem ruh ha ka sorkar Assam, hynrei kane ka jingwan kyntur pud ka sorkar Assam ka dang ïai bteng haduh mynta” u la ong. U la ong ba ka seng ka pynrem jur ïa ka sorkar Assam kaba la wan tam pud na ka por sha ka por.
Nalor kata, u la pynpaw ka jingsngewsih namar haba ka seng ka la leit jurip ïa ki jaka sah jong ki pulit ha Lapangap, ka long shisha kaba isangsot namar kam biang ka jaka sah, kam biang ka um bad ka jaka leit paiñkhana.
