Shillong, Risaw:
Ki nonghikai skul Lower Primary ha ka ri India baroh kawei ki la pynkut noh ïa ka Bus Bharat Yatra kaba dei ka jingïaid kylleng sawdong ka ri ban pynsngew ïa ki mat jingdawa na ka bynta ka bha ka miat jong ki nonghikai bad kane ka Yatra ka la kut ha ka sngi Palei ha Nongbah Delhi hadien ba ka la ïaid shi bnai kynthih naduh ka 5 tarik Nailur, 2023.
Ki nonghikai skul Lower Primary na Meghalaya ruh ki la poi lang sha nongbah Delhi ha kane ka sngi ba pynkut ïa ka Yatra ha kaba da ki spah ngut ki nonghikai ki la leit ïashimbynta hapoh ka jingïalam u General Secretary ka AMPSTA u Bah F.C Shullai bad u President ka AMPSTA u Mirthunjoy Marak.
La sakhi ruh ïa ka jingwan ïashimbynta lang da ki nonghikai skul Lower Primary na kylleng ka ri India kaba la pynlong ïa ka jingïalang pynkut ha Siri Fort Auditorium, Institutional Area, New Delhi.
Ha kane ka sngi, la leh burom bad kynmaw burom ïa u National President ka All India Primary Teachers’ Federation (AIPTF) u Rampal Singh, uba dang shu khlad shen, ha kaba la donlang ruh ka Susan Hopgood, kaba dei ka President jong ka Educational International nalor u Kamala Kantha Tripathy, uba dei u General Secretary ka AIPTF.
Kane ka Bus Bharat Yatra ka la sdang na baroh sawdong ka ri India kata, na North East, West, North bad South India ha ka 5 tarik Nailur, 2023 ban dawa na ka Sorkar Pdeng ban pyntreikam biang ïa ka baibam kaba ju pyntreikam mynshwa lane ‘Old Pension Scheme’ na ka bynta ki nongtrei Sorkar kumjuh ruh na bynta ki nonghikai bad ban thungkam pura lane regularize ïa ki nonghikai contract ha baroh ki rukom bad ban pynlong ryntih ïa ka jingsiew na bynta ki nonghikai ha ka ri baroh kawei.
