Shillong, Risaw 06
Ka Meghalaya State Women Commission ka la jan ïoh ïa ka shongknor lane Chairperson kaba thymmai namar ka Search Committee ka la dep ïoh 4 ngut kiba don ha ka thup kyrteng na ka bynta ban shahjied.
Haba kylli na u Myntri ka tnat Social Welfare, Bah Paul Lyngdoh ha ka sngi Thohdieng, u la ong ba ka Search Committee ka la phah ïa ki kyrteng bad ki don 4 ngut ha ka thup kyrteng na ka bynta ban shahjied kum ka Chairperson.
U la ong ba ïa ki kyrteng ym pat lah ban ïathuh namar kane ka kam dang donkam ban ïakren biang bad u Myntri Rangbah bad mynjur ka Kynhun Myntri. Ka Meghalaya State Women Commission ka la sah thylli khlem ka Chairperson hadien ba la iehnoh kam ka Kong Phidalia Toi kum ka Chairperson.
