Shillong, Risaw 06
U MLA jong ka Mawhati Konstitwensi, Bah Charles Marngar ha ka sngi Thohdieng u la wan ïalam lang ïa ki ‘riew rangbah, ki longkmie ka thaiñ Mawhati ban kyrpad ïa u Symbud Myntri Rangbah ka jylla bad uba dei peit ïa ka tnad PWD, Bah Prestone Tynsong ban siang surok rong noh na Sonidan ter ter shaduh Umsiang kaba don kumba 40 kilomitar.
Haba kren sha ki lad pathai khubor hadien ka jingwan ïakynduh ïa u Bah Prestone Tynsong, u Bah Charles u la ong ba katei ka surok ka dei kaba ïaid na Umsning shaduh Umsiang ban mih sha Assam bad 40 kilomitar la dep ban siang rong katba sa 40 kilomitar pat ka dang sniew bad sah kumjuh.
“Kumba 40 kilomitar haduh mynta ngi na ka liang jong ngi hapoh konstitwensi ngi dang mad jingeh namar ba dang sah ujuh u surok naduh mynshwa ka jingsniew”, la ong u Bah Charles.
Na ka liang u Bah Charles u la pynpaw ka jingsngewnguh ïa u Symbud Myntri Rangbah uba la kular ban pynbha bad siang rong noh ïa katei ka surok. U la phah ruh ha ki ophisar ka PWD ba kin pynkhreh noh ïa ka kaiphod ban sdang noh ïa ka kam.
Nalor kane, u Bah Charles u la ïathuh ba kawei pat ka surok ka long na Umsning sha Mawrong kaba la dep siang 2 kilomitar bad ka dang sah sa 17 kilomitar kaba la pynrung ha ka skhim PMGSY bad ïa kane ruh la kyrpad ïa u Symbud Myntri Rangbah ban shna pyndep noh.
Na ka liang u Bah Charles u la ong ba ïa kane ka surok la dep ban thep ha ka skhim PMGSY bad shen yn sa sdang noh ban trei ïa ka kam.
“Ngi kyrmen skhem ba kan long kumba ngi la ïakren bad pynbeit bad nga ngeit ba kan long ka jingkyrkhu ïa ki paidbah nongshong shnong ki jong ngi kiba don ha kane ka dong bad ka konstistwensi jong ngi baroh namar ba ngi donkam shisha ïa u surok ha ka leit ka wan ka jong ngi”, la ong u Bah Charles.
